Rastrexarán cepas da covid-19 nas augas residuais da Coruña
O Concello asina un convenio de colaboración con Augas de Galicia que ampliará as tarefas que actualmente realiza CovidBens para secuenciar a covid-19 nestas augas.
Por Europa Press / Redacción | A Coruña | 27/02/2021 | Actualizada ás 19:30
A alcaldesa da Coruña e presidenta de Edar Bens, Inés Rey, asinou un convenio de colaboración con Augas de Galicia que ampliará as tarefas que actualmente realiza CovidBens para secuenciar a covid-19 nas augas residuais da Coruña, Arteixo, Cambre, Culleredo e Oleiros para detectar mutacións do virus.
A rexedora sinala que grazas a este proxecto pódese anticipar os gromos dúas semanas antes que os datos clínicos e cualificou de "gran avance" este novo paso na investigación, denominado, seqCovidBens, que permitirá seguir "máis de preto as mutacións do virus que proliferan nos últimos días".
O Concello da Coruña sinalou que, con este novo acordo, agora poderase determinar a abundancia relativa das diferentes cepas do virus na poboación da área metropolitana ao longo do tempo.
Isto permitirá detectar e cuantificar aquelas variantes mutantes do SARS-CoV-2 maioritarias en cada momento e establecer un sistema de vixilancia epidemiolóxico baseado nas augas residuais que lle permita ao sistema sanitario valorar os retos aos que se enfronta en cada momento.
Ademais, este sistema será válido para calquera tipo de mostra de augas residuais e, por tanto, poderase estender a todo o territorio que se desexe.
O proxecto CovidBens monitora a carga viral nas augas residuais da área metropolitana da Coruña desde abril de 2020. Esta análise permite anticipar ata 18 días a aparición de brotes e é de utilidade para que as autoridades sanitarias poidan dar unha resposta rápida.
A partir da cantidade de material xenético do virus presente na auga residual, CovidBens pode estimar o número de persoas totais infectadas na poboación.
