(VÍDEO) Voces do feminismo de antes e de agora: "as mulleres eramos o último restroballo"

O movemento feminista galego naceu, entre outras, da man das ensinanzas das escritoras Emilia Pardo Bazán ou Rosalía de Castro, que serviron de inspiración a moitas mulleres que, como Luz Fandiño, reivindicaron o papel da muller na sociedade galega, así como a defensa do idioma propio.

Luciña, como a chamaba a súa avoa, contounos como era ser muller na súa época: "a muller tiña que achantar, eramos o último restroballo". Así, decidiu comezar a escribir poemas feministas nos que expoñía o difícil que era ser muller: 

Coido que son

licenciada na dura

carreira da vida

Fiquei matriculada

antes de nacer

foi moi dura 

a aprendizaxe

simplemente para ser

unha muller

Fandiño serviu de inspiración a outras mulleres para tomar consciencia da súa situación de desigualdade, polo que comezaron a aparecer agrupacións feministas como a Asociación Galega da Muller, fundada en 1976, e revistas de contido feminista como Festa da palabra silenciada ou Andaina.

Grazas ás agrupacións e revistas feministas, cada vez máis mulleres, antes silenciadas, sumáronse ao feminismo que, como nos relata a xornalista Margarita Ledo, comezou a levar a cabo actos de protesta por sucesos puntuais -por exemplo, cando un home acometía unha violación a unha muller- e tamén a convocar manifestacións para esixir dereitos básicos como o divorcio e o aborto.

Desta maneira, a sociedade foi cambiando ata que o feminismo deixa de considerarse unha cuestión que atinxe soamente a mulleres, senón un movemento que abrangue a toda a sociedade e que loita pola igualdade total de oportunidades e posibilidades entre homes e mulleres.

Porén, Priscila Retamozo, activista feminista de Galegas 8M defende que aínda queda moito por facer por conseguir a igualdade real, xa que "as mulleres somos o 50% da poboación, pero non somos o 50% en ningunha esfera de poder". Por isto, defende, as mulleres deben conquistar o espazo público mediante manifestacións para que "se nos escoite".

Con todo, Andrea Valle, activista feminista, defende que é na educación onde débese facer o maior esforzo e introducir contido feminista, opinión que comparte Priscila, quen defende que, educando ás novas xeracións en feminismo, "conseguiremos sociedades democráticas baseadas na igualdade".