Rexistran no Concello de Celanova a petición para retirar a cruz franquista antes do 8 de agosto
O Comité de Memoria Histórica da Comarca pretende que se desfagan do monumento antes de se cumprir 92 anos da súa inauguración.
Por Europa Press / Redacción | SANTIAGO DE COMPOSTELA | 06/03/2021 | Actualizada ás 20:18
O Comité de Memoria Histórica da Comarca de Celanova rexistrou este venres no Concello da capital unha moción, para debater no pleno municipal do mes de marzo, pola que se solicitará que se retire antes do 8 de agosto a cruz franquista situada no Outeiro da Obra.
Esta petición parte dun estudo histórico e un manifesto con máis de 1.500 firmas, entre elas a de personaxes da política, a cultura ou a universidade, en apoio á retirada deste monumento erixido nun terreo elevado a medio quilómetro do centro de Celanova. Nel están gravados o escudo oficial do bando sublevado, o emblema da Falanxe e a seguinte lenda: 'Aos combatentes da parroquia de Celanova caídos por Deus e España'.
A iniciativa para debater no pleno reclama a retirada do monumento antes do próximo 8 de agosto, cando se cumprirán 92 anos da súa inauguración en 1939 nunha cerimonia de homenaxe "aos caídos da Cruzada".
Ademais, a moción rexistrada cita a Lei 52/2007, de Memoria Histórica, para pedir que se quite "toda a sinaléctica oficial" para restituír o topónimo tradicional do lugar, así como a elaboración por parte do goberno local dun catálogo de "vestixios, escudos, insignias, honras, placas e outros elementos ou mencións conmemorativas" da sublevación militar de 1936.
De igual modo, a moción buscará instar o Concello a realizar unha homenaxe e unha declaración institucional que rexeite o "desagravio" aos concelleiros da última corporación republicana, así como aos funcionarios que foron represaliados.
O propio Comité de Memoria Histórica da Comarca de Celanova xa presentou o informe histórico que apoia as súas reivindicacións aos distintos grupos da Corporación e, segundo asegura o colectivo nun comunicado, obtivo "o compromiso" do alcalde, Antonio Puga, de que podería acudir a defender a súa moción ao pleno de marzo.
