Os sindicatos rexeitan o plan de Educación de atención á diversidade
A mesa sectorial abordou o borrador do texto que desenvolve "dez anos despois" o decreto nesta materia.
Por E.P. | Santiago de Compostela | 23/03/2021 | Actualizada ás 19:34
A Consellería de Cultura, Educación e Universidade presentou aos sindicatos en mesa sectorial o borrador da orde de atención á diversidade, un proxecto que os representantes docentes acolleron con reservas ao presentar diversas "carencias" e que resulta desfasado nalgúns aspectos en relación aos tempos e á evolución do sistema educativo.
O documento desenvolve o decreto 229/2011 de atención á diversidade, un texto publicado hai case unha década, e ao mesmo tempo busca aglutinar toda a normativa nesta materia que se atopaba dispersa.
No entanto, as organizacións docentes consideran que o borrador non cumpre co seu obxectivo, ao presentar cuestións no seu articulado que non están adaptadas á LOMLOE e inclúen termos de lexislación que xa non se atopan en vigor.
É un dos puntos dos que advirte o sindicato ANPE, sobre un texto que a pesar de chegar "especialmente tarde" presenta "moitas carencias" e necesita unha revisión da súa estrutura e do seu articulado para adaptarse á lexislación actual.
"Debe revisarse en profundidade a redacción do texto, xa que se mesturan en diversas ocasións terminoloxías da LOGSE e terminoloxías propias da LOE sen facer referencia á LOMLOE, do mesmo que ocorre en diferentes artigos do proxecto de orde", explican.
A CIG tamén censurou que o texto está desfasado aos tempos, "non se adapta ao momento actual" e mesmo presenta unha concepción "obsoleta" da atención á diversidade ao entender a diferenza "como algo negativo" e "un problema dos centros que hai que solucionar".
