A externalización de traballos de arqueoloxía da Xunta, recorrida ante o TSXG

A CIG presentou un recurso que asegura que foi admitido a trámite ante a sala do contencioso do Tribunal Superior de Xustiza de Galicia (TSXG) contra a Consellería de Cultura por realizar "reiteradas encomendas de xestión" a Tragsatec para realizar traballos "que son propios do persoal funcionario" do departamento autonómico.

Pola súa banda, fontes da consellería que dirixe Román Rodríguez limítanse a defender que este "é un medio propio da administración, previsto na normativa, que se emprega en base ao interese público".

A Dirección Xeral de Patrimonio Cultural conta cunha comisión do patrimonio histórico e dos camiños de Santiago que é a encargada, entre outras competencias, de elaborar os expedientes de autorización de obras que se acometan no ámbito de influencia dos camiños.

"Normalmente estes expedientes levan un informe arquitectónico dos elementos construtivos que se acometen e se a obra afecta a un elemento patrimonial (castro, petróglifos, etcétera) tamén é preceptivo un informe arqueolóxico feito polo persoal técnico da consellería", explica a central nacionalista.

Con todo, o número de arqueólogos é, para a CIG, "manifestamente insuficiente para cubrir todas as necesidades de inspección e elaboración de informes". En concreto, sitúao "ao redor de 15" entre servizos centrais e xefaturas territoriais.

Unha situación que advirte de que se ve "agravada" polo aumento "enorme" de expedientes de obra co recoñecemento e delimitación de máis camiños que o francés e co aumento da distancia de influencia.

Neste contexto é no que critica que "en 2018 a dirección xeral comezou a recorrer á perversa figura de encomenda de xestión a Tragsatec, que foi renovando ata o día de hoxe con seis encomendas que pasan do millón de euros".

O departamento autonómico puntualiza que "o Grupo Tragsa, de capital social integramente público, está integrado polas sociedades mercantís Tragsa e Tragsatec".

O pasado 31 de decembro, segundo denuncia a CIG, o DOG deu publicidade a "unha nova encomenda" a Tragsatec para "un traballo que tería que ser realizado por arquitectos e arqueólogos funcionarios, pero que se externaliza a unha suposta empresa pública que non ten entre os seus fins realizar traballos deste tipo".

O "escandaloso" desta nova encomenda, para a central nacionalista, é "que é a sétima desde xullo de 2018" e que este "se converteu no funcionamento normal da administración".

Con isto, de acordo cos seus números, "destináronse xa máis de 1,5 millóns de euros dos galegos para esta contratación dunha administración paralela", no marco dunha "arbitrariedade" xa que "unha encomenda que en 2018 custou 261.000 euros, en 2019 fíxose por 159.000, en 2020 custou primeiro 395.000 e logo 308.000 euros e en 2021 valerá 409.000 euros".