Preséntase Movemento Arredista, un "proxecto abertamente independentista" vinculado ao BNG e á CIG
"Temos a vontade de sumar forzas e afortalar a unidade de acción dos espazos frentistas de masas nos que participamos, particularmente no BNG e na CIG", di.
Por Galicia Confidencial | Compostela | 25/03/2021 | Actualizada ás 21:23
O Movemento Arredista xa se presentou públicamente. Foi este xoves no parque de Bonaval de Compostela tras rematar o proceso constituínte “Sumarmos forzas pola ruptura”, iniciado en outubro de 2020.
"Compromiso militante, traballo de base, construción de poder popular e a suma de forzas en todos os espazos, "nomeadamente afortalando o BNG e a CIG desde posicións revolucionarias". Eses son os principias obxectivos do Movemento Arredista, unha nova ferramenta política para sumar forzas pola "ruptura democrática".
Foi o domingo 28 de febreiro cando celebrou a Asemblea Nacional Constituínte co proceso lanzado en outubro de 2020. "Daquela faciamos unha convocatoria aberta á conformación dunha nova organización que consolidase no seo do soberanismo un novo referente organizativo desacomplexadamente independentista, que aposte polo socialismo e sexa consecuentemente feminista", indicaban.
Este xoves unha representación da Mesa Nacional compareceu para presentar o logotipo e as liñas básicas da organización, aprobadas nesta asemblea. O acto foi introducido por Susana Camba (membro da Executiva Nacional do BNG e concelleira na Estrada), que deu paso ás duas compañeiras da nosa Mesa Nacional que leron o texto de presentación: Silvia Pardo (militante feminista e portavoz do BNG no concello das Pontes) e Noa Presas (deputada do BNG).
Movemento Arredista insiste no seu "proxecto abertamente independentista, comunista e feminista" con vocación de intervir en todos os ámbitos da sociedade. "Farémolo desde as nosas posicións e con voz propia, mais sempre coa vontade de sumar forzas e afortalar a unidade de acción dos espazos frentistas de masas nos que participamos, particularmente no BNG e na CIG, onde seguiremos a xogar un papel fundamental", indica nun comunicado.
"Pensamos que hoxe maís que nunca é preciso organizarse, recuperando os valores da militancia e do compromiso para darmos unha resposta a todo o que está a pasar. Só así poderemos facer frente a esta nova crise xa en marcha, cuestionando desde a raiz un sistema que atenta cada vez máis contra as nosas vidas", engade ao tempo que anuncia presentacións por todo o país para achegar novas persoas ao proxecto.
