A Xunta acusa o Goberno central de restarlle aos autónomos e pemes galegas 100 millóns de euros en axudas
O Executivo central destinará a Galicia algo máis de 230 millóns, co que se converte "practicamente na comunidade que menos diñeiro vai recibir", lamenta Rueda.
Por Europa Press / Redacción | Santiago de Compostela | 27/03/2021 | Actualizada ás 16:17
O vicepresidente primeiro da Xunta, Alfonso Rueda, criticou este sábado o "desaire" do Goberno central aos autónomos e pemes galegas beneficiarios do fondo de axudas postcovid, que recibirán, indicou, 100 millóns menos "do que terían que recibir".
Rueda dixo que o Goberno galego recibiu este venres "con absoluta decepción" a cifra que o Executivo central destinará a Galicia, algo máis de 230 millóns, co que se converte "practicamente na comunidade que menos diñeiro vai recibir".
"Non o entendemos", dixo Rueda, para quen "parece que primeiro se decide a cantidade en base a criterios que non son obxectivos e logo téntase revestir para facer entendible o que non ten explicación".
De acordo cos establecementos, a poboación e as perdas, Galicia debería "recibir 100 millóns máis", explicou o vicepresidente, que lamentou que un hostaleiro de Baleares "vaia recibir case sete veces máis que un hostaleiro galego".
Esta "cantidade moi inferior"; engadiu, "non é un desaire á Xunta, se non aos galegos que necesitan as axudas", resolveu.
