Semana Santa comeza con novas repuntas en contaxios, casos activos e hospitalizacións
A taxa de positividade ascende a un 2,4% en Galicia.
Por Europa Press / Redacción | Santiago de Compostela | 29/03/2021 | Actualizada ás 11:03
Os pacientes Covid hospitalizados en Galicia subiron en seis ata os 206, nun inicio de semana no marco da Semana Santa no que repuntan os novos contaxios a 133 e os casos activos ata os 2.327. Segundo os datos actualizados na mañá deste luns pola Consellería de Sanidade con rexistros ata as 18,00 horas deste domingo, hai 27 persoas con Covid en UCI na Comunidade galega --unha máis-- e 179 noutras unidades de hospitalización --cinco máis--.
Salvo nas áreas sanitarias de Vigo e Santiago-Barbanza, onde a presión hospitalaria baixa lixeiramente, e nas de Ferrol e Lugo, onde non hai cambios, aumentan os hospitalizados nas de Ourense, A Coruña e Pontevedra-O Salnés. En concreto, na da Coruña e Cee aínda que baixan a 14 os pacientes Covid en UCI --un menos--, ascenden a 63 os doutras unidades --catro máis--; na de Ourense segue un en críticos e soben a 20 os que permanecen noutras unidades --tres máis--. E na de Pontevedra e O Salnés mantense un en UCI e ascenden a 20 os doutras unidades --dúas máis-.
Pola súa banda, mantéñense sen cambios as áreas de Ferrol --con ningún en UCI e 12 noutras unidades convencionais de hospitalización-- e Lugo --con dúas en críticos e 11 noutras unidades--. Mentres, na de Vigo aumentan a seis os pacientes Covid en UCI --un máis-- pero baixan a 38 os doutras unidades --dous menos-- e na de Santiago e Barbanza soben a tres o críticos --un máis-- e caen a 15 os doutras unidades --dous menos--.
MÁIS CASOS ACTIVOS E CONTAXIOS
En canto aos casos activos deste coronavirus experimentaron un lixeiro ascenso neste inicio de semana ata os 2.327 no conxunto de Galicia, o que supón 18 máis que a xornada anterior, ao haber máis contaxios que altas. No entanto, por áreas sanitarias soben en catro --Vigo (+14), Santiago-Barbanza (+15), Lugo (+13) e Pontevedra-O Salnés (+8)-- e baixan en tres --A Coruña-Cee (-20), Ourense (-5) e Ferrol (-7)--. Deste xeito, a área da Coruña e Cee mantense á cabeza, con 847; seguida da de Vigo, con 574; a de Santiago e Barbanza, con 248; Pontevedra e O Salnés, con 217; Lugo, con 175; Ferrol, con 139; e Ourense mantense á cola, con 127.
No relativo aos novos contaxios detectados con calquera tipo de proba repuntaron a 133, tras os 122 rexistrados a xornada anterior no conxunto da Comunidade galega. Do total, 118 foron positivos confirmados por PCR nas últimas 24 horas, deles 35 na área da Coruña e Cee; 27 na de Vigo; 20 na de Santiago e Barbanza, 18 na de Lugo; 12 na de Pontevedra e O Salnés; catro na de Ferrol; e dous na de Ourense.
Por iso, os contaxiados pola Covid-19 en Galicia ascenden a 116.749, dos cales 28.345 corresponden á área da Coruña e Cee; 22.117, á de Vigo; 18.454, á de Santiago e Barbanza; 14.825, á de Ourense; 12.733, á de Pontevedra e O Salnés; 12.028, á de Lugo; e 8.247 á de Ferrol.
TAXA DE POSITIVIDADE
Galicia levou a cabo 1.841.195 PCR ata a data da última actualización de datos, que supoñen 5.498 probas máis que as contabilizadas ata a xornada anterior --case un milleiro menos en relación ás feitas o domingo--. Pola súa banda, a taxa de positividade ascendeu ao 2,4 por cento, tras caer por baixo do 2% a xornada anterior. Con todo, Galicia mantense por baixo do 5% que a Organización Mundial da Saúde (OMS) sinala para dar por controlada a pandemia.
VÍTIMAS E CURADOS
Desde o inicio da pandemia faleceron 2.334 persoas diagnosticadas de Covid-19, tras notificar Sanidade na tarde deste domingo o falecemento de dúas vítimas máis. En concreto, morreron con coronavirus dúas mulleres de 90 e 88 anos que permanecían ingresadas no Complexo Hospitalario Universitario de Vigo (Chuvi) e contaban con patoloxías previas. Ata o momento curáronse da Covid-19 en Galicia 112.108 pacientes, o que implica 113 máis que as contabilizadas ata a xornada anterior.
