Por Galicia Confidencial | Compostela | 08/04/2021 | Actualizada ás 17:44
A Xunta de Galicia seguirá esixindo o uso obrigatorio da máscara para facer deporte individual naquelas zonas nas que haxa outros viandantes ou se produzan aglomeracións, especialmente, en zonas urbanas, a pesar de que a normativa estatal non o esixe con carácter xeral.
Así o asegurou o presidente galego, Alberto Núñez Feijóó, na rolda de prensa tras o Consello da Xunta, na que avanzou que o próximo día 14 de abril avaliarase se é posible pospor o toque de queda en Galicia máis aló das 22 horas, en función da situación epidemiolóxica.
Sobre a práctica do deporte individual sen máscara, Núñez Feijóo explicou que este asunto consultouse coa Asesoría Xurídica da Xunta e que a resposta foi que si se pode esixir, a pesar de que a lexislación estatal non recolla esta obrigación.
De feito, criticou a lei de nova normalidade pola "contradición" de esixir máscara na praia para pasear mentres non establece esta obrigatoriedade para correr polo mesmo sitio, co cal se pode darse o paradoxo de que un corredor sen esta protección cruce con xente paseando que si que debe levala.
"Non somos quen de explicar iso", lamentou, á vez que reprochou que "moita calidade lexislativa non parece que haxa" cando días despois de aprobar a lei xa xorden este tipo de contradicións e hai que adoptar medidas interpretativas no Consello Interterritorial de Saúde para modularla.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.