A crise da covid destrúe empregos de media e baixa cualificación
Un informe desvela que as folgas caen en Galicia un 68,9% en todo 2020, ao rexistrarse 9 por cada 100.000 empresas.
Por E.P. | Vigo | 12/04/2021 | Actualizada ás 11:22
En todo o ano 2020, marcado pola pandemia da covid-19, destruíronse en Galicia uns 15.100 postos de traballo --un 1,4% do total--. Destes, 3.200 eran de alta cualificación, case catro veces menos que os 11.900 do resto de categorías.
Estes datos despréndense dun estudo elaborado polo grupo Adecco, denominado 'Monitor Adecco de Oportunidades e Satisfacción no Emprego', que puxo o foco en que "o groso dos empregos perdidos" na Comunidade galega ao longo o catro trimestres que durou o 2020 "é de media ou baixa cualificación".
Como consecuencia desta desigualdade na destrución de postos de traballo, rexistrouse un aumento na proporción daqueles que esixen alta cualificación. Así, no último ano creceron un 0,6%, ata o total do 31,8% sobre o total. Aínda que é un dato inferior á media española --34,5%--, é o mellor rexistro en Galicia desde xuño de 2010, de acordo co mesmo estudo.
En comparación ao resto de autonomías, a galega sitúase entre as nove onde baixaron os empregos cualificados. Delas, tan só Euskadi (-0,2%) presenta unha caída menor que Galicia, mentres que nas outras sete a destrución de postos de traballo desta tipoloxía é maior: Castela e León (-1,3%), Comunidade Valenciana (-1,7%), Cantabria (-2,2%), Madrid (-2,9%), Canarias (-4%), Aragón (-6,2%) e Estremadura (-8,8).
Ademais, este mesmo informe de Adecco destaca que un 8,4% dos galegos ocupados "traballa menos horas da que querería, quere ampliar a súa xornada ou atopar un segundo emprego e non atopa onde facelo". Neste caso, a proporción é un 0,4% inferior ao dato de todo o Estado.
CONFLITOS LABORAIS
En relación co número de folgas, reducíronse por terceiro trimestre consecutivo, co que 2020 acabou cun rexistro de 9 conflitos cada 100.000 empresas en Galicia, o seu dato máis baixo desde que existen estatísticas --unha caída interanual do 68,9%--.
Así, de acordo con Adecco, esta variable sufriu na Comunidade galega case 20 puntos máis que a rexistrada de media en todo o Estado, con 8,5 folgas por cada 100.000 empresas --un 49,2% menos interanual--. Con todo, Galicia sitúase como a quinta autonomía en número de folgas por cada 100.000 empresas, tan só superada por Euskadi, Navarra, Asturias, Aragón e Cantabria.
