Por Galicia Confidencial | SANTIAGO DE COMPOSTELA | 13/04/2021 | Actualizada ás 22:15
A miniserie “Sofía Casanova, a obreira do pensamento” comezou este luns a súa rodaxe en Galicia. As gravacións terán lugar íntegramente na provincia da Coruña, a maioría no concello de Oleiros, nas localidades de Lorbé e Mera. Ademais, a rodaxe tamén se trasladará aos concellos Touro e Santiago de Compostela.
ELENCO GALEGO E FEMININO
O equipo de rodaxe de ‘Sofía Casanova, a obreira do pensamento’ é galego na súa totalidade
e con mulleres á fronte, tanto no equipo de dirección coma no elenco. A miniserie está dirixida por Zaza Ceballos e Noelia Muíño e no equipo de guión conta con Rosa Castro. No papel de Sofía Casanova está Isabel Naveira, recoñecida actriz galega que participou en
series como Matalobos, Fariña ou Vis a Vis. A miniserie conta tamén no seu elenco con outros grandes nomes do audiovisual galego como Tito Asorey, Paula Cereixo, Mercedes Castro e Nuncy Valcárcel. No equipo artístico tamén atopamos nomes de referencia: Alberte Branco como director de fotografía, Antonio Pereira como responsable de Arte e Manu Conde como encargado da música.
‘Sofía Casanova, a obreira do pensamento’ é unha producción de Zenit Televisión
coa participación da Corporación Radio Televisión De Galicia e co apoio económico da Xunta de Galicia.
SOFÍA CASANOVA, INTELECTUAL GALEGA
Sofía Casanova é recoñecida mundialmente polas súas crónicas e escritos xornalísticos,
sendo a primeira muller do Estado correspondente de guerra. O filme tratará, pois, a parte profesional desta intelectual galega pero tamén afondará na súa faceta máis persoal dando
unha visión ampla da súa figura. "'Sofía Casanova, a obreira do pensamento' abranguerá non só á Sofía xornalista senón tamén á Sofia muller, nai e esposa que chegou a Galicia para superar unha fonda crise existencial", indica a produtora nun comunicado. A miniserie contará tamén a especial relación que tivo Sofía Casanosa con Pepa, a súa criada en Mera que se converteu na súa mellor amiga e aliada.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.