A Xunta modifica as axudas a escolas infantís privadas para facilitar o acceso á convocatoria

A Consellería de Política Social publica este venres no Diario Oficial de Galicia (DOG) unha orde que modifica a do 30 de decembro de 2020 e pola que se regulan as bases que rexen o procedemento de concesión de axudas a entidades privadas para o fomento da gratuidade da atención educativa para segundos fillos ou fillas e sucesivas en escolas infantís de 0-3 anos e procédese á súa convocatoria para os anos 2021 e 2022.

Sobre esta modificación, explica que ten por obxecto "facilitar o acceso a esta convocatoria de axudas a aquelas entidades cuxos prezos se sitúan por baixo dos topes previstos nela para que poidan compensar, no seu caso, o incremento experimentado polos prezos das subministracións e outros gastos correntes que repercuten nos custos das prazas".

Esta convocatoria de axudas está dirixida ás entidades privadas para promover a aplicación nas escolas infantís 0-3 anos dunha bonificación do 100% do prezo correspondente á atención educativa prestada entre o 1 de xaneiro de 2021 e o 31 de agosto de 2022 e da gratuidade da matrícula relativa ás prazas ocupadas para o curso 2021/22 por segundos fillos ou fillas e sucesivos/as da unidade familiar.

"E tamén a aquelas entidades privadas que non tivesen acceso a unha axuda económica da Administración autonómica por este concepto e acrediten a gratuidade da matrícula do curso 2020/21 e a aplicación dunha bonificación do 100% do prezo correspondente á atención educativa prestada desde o inicio do devandito curso".

Co cambio introducido, a orde de 30 de decembro de 2020 modifícase de forma que as axudas "calcularanse en función das tarifas e do prezo da matrícula da escola infantil no curso 2020/21, as cales poderán incrementarse ata un 10% para o curso 2021/22, sen superar o tope de 260 euros/mes e 200 euros por atención educativa e matrícula respectivamente, e do número de segundos/as e sucesivos/as fillos/as que a entidade declare na solicitude".

Ademais, establece que poderá modificarse a resolución inicial "cando existan variacións nas tarifas respecto das establecidas no curso 2020/21 e/ou no número de prazas ocupadas por segundos fillos ou fillas e sucesivos/as durante o período de aplicación desta convocatoria".

Tamén se abre un novo prazo de presentación de solicitudes que será dun mes contado a partir do día seguinte á publicación desta orde no Diario Oficial de Galicia. No entanto, as entidades que presentasen solicitude ao amparo da Orde de 30 de decembro de 2020 non terán que presentar unha nova solicitude.

Un neno pinta nunha escola infantil. XUNTA - Arquivo