A construción de parques eólicos non para: aberto o prazo de alegacións de dous na provincia da Coruña

Os proxectos eólicos seguen inzando Galicia. O Ministerio de Política Territorial e Función Pública vén de someter a información pública outros dous parques que afectan á provincia da Coruña. Trátase, por unha banda, do Parque Eólico Pedrabante, impulsado por Iberdrola Renovables Galicia e integrado por un total de 20 aeroxeneradorers de 107,5 metros de altura. Ubicado nos termos municipais de Carballo, Tordoia, Val do Dubra, Trazo, Vimianzo, Ordes, Cerceda e Carral, a potencia instalada alcanzaría os 90 MW. 

Pola outra banda, tamén se somete a información pública este mesmo luns o Parque Eólico Berdoias, construído igualmente por Iberdrola e cuxa infraestrutura, integrada por 17 aeroxeneradores de 107,5 metros de altura, supera os 76 MW de potencia. Os municipios afectados neste caso son Vimianzo, Muxía, Dumbría, Ordes, Cerceda, Santa Comba, Tordoia, Trazo, Val do Dubra, Zas e Carral.

O prazo de alegacións para ambos os parques remata o día 8 de xuño, segundo informa o colectivo veciñal Salvemos a Comarca de Ordes, que denuncia a través da súa páxina de Facebook a intención do Goberno de España e Xunta de Galicia de converter o país "nun polígono industrial para exportar electricidade e que grandes multinacionais fagan negocio". Con estes outros dous parques eólicos, a Comarca de Ordes suma xa un total de 14 proxectos a través dos cales se erguerán ata 147 aeroxeneradores.