A Xunta defende a reforma laboral de Rajoy e critica os cambios previstos polo actual Goberno

O vicepresidente segundo da Xunta e conselleiro de Economía, Empresa e Innovación, Francisco Conde, cualificou como "útil" a reforma laboral impulsada polo Goberno de Mariano Rajoy no ano 2012, porque permitiu "afrontar a recuperación económica da anterior crise". Por iso, defendeu que "calquera modificación" neste ámbito no das pensións "non debe responder nunca a intereses partidistas".

Así, pediu que hipotéticos cambios que se realicen deben producirse "sobre todo no marco do diálogo social", sen improvisacións e outorgando "seguridade" tanto aos traballadores como aos propios empresarios. Todo iso manifestouno Conde nunha entrevista concedida este domingo á Radio Galega e recollida por Europa Press, na que criticou que a Xunta "non coñece o alcance real" das propostas remitidas polo Goberno de España á Unión Europea.

"CRITERIOS CLAROS" NA REPARTICIÓN DE FONDOS

Sobre a reunión mantida esta semana entre o presidente da Xunta, Alberto Núñez Feijóo, e a vicepresidenta segunda do Goberno, Nadia Calviño, o conselleiro de Economía --tamén presente nesta entrevista-- explicou como os representantes galegos trasladaron "a importancia de ter criterios claros" na repartición dos fondos europeos 'Next Generation'.

"INSÓLITO" A PRESENZA DE DÍAZ NO 1 DE MAIO

Así mesmo, preguntado sobre as manifestacións do 1 de maio en Madrid, Francisco Conde dixo "respectar calquera decisión" neste sentido, aínda que cualificou de "insólito" que a ministra de Traballo, Yolanda Díaz, pretendese "liderar" a marcha "nun día en que os traballadores saen ás rúas contra o Goberno do paro".

Ao seu xuízo, a presenza da tamén vicepresidenta terceira de España nestas mobilizacións responde a "unha decisión máis estética" dun Executivo "que está a tomar decisións que pon en risco 15.000 empregos en Galicia". "O que necesita España é menos estética e máis política útil", resolveu.

LEI DE CAMBIO CLIMÁTICO

Na entrevista na Radio Galega, o responsable económico da Xunta censurou tamén que a Lei de Cambio Climático e Transición Enerxética "trae máis problemas que solucións". En primeiro lugar, explicou, os cidadáns que contan cunha vivenda en dominio público marítimo-terrestre "non poden alugar as súas casas como turísticas"; mentres que "tamén hai un impacto sobre a industria conserveira, impedindo as prórrogas máis aló dos 75 anos".

VENDA DE ALCOA

Sobre a posible venda da planta de Alcoa San Cibrao, Conde lamentou que tanto o Estado --a través da SEPI-- como a empresa "limitáronse a deixar ao carón a negociación" para agora "volver á casa de saída" cando o proceso "estaba xa practicamente culminado".

Neste contexto, apelou ao Goberno central para que "asuma ese compromiso" de "liderar esa venda". "Entendemos que, antes de poder falar con terceiras empresas, o primeiro é que Alcoa e a SEPI concreten ese acordo de venda e senten nesa mesa de negociación", continuou.

No caso de que ese diálogo non prosperase, Conde recoñeceu que "hai outros posibles compradores" como Liberty, que "mantén o seu compromiso": "Pero creo que ese é un estadio no que non estamos nestes momentos".

O vicepresidente económico da Xunta tamén reclamou ao Executivo central que "actúe de forma inmediata" cunha "auditoría técnica financeira" no caso da planta de Alu Ibérica na Coruña, tendo en conta que a xustiza investiga a venda por parte de Alcoa ao fondo Parter e, seguidamente, ao Grupo Risco.

FERROL E NAVANTIA

Finalmente, acerca da proposta de pacto de Estado para revitalizar a comarca de Ferrol, o tamén conselleiro de Economía insistiu en tender a man ao Goberno de España e aos concellos para que cada administración adopte medidas "no campo das súas competencias". Así, avanzou que, por parte da Xunta, manterá esta mesma semana reunións con sindicatos, alcaldes e empresarios.

O vicepresidente segundo da Xunta, Francisco Conde, nunhas xornadas con concellos da provincia de Lugo para explicar a nova lei de simplificación administrativa. XUNTA | Fonte: Europa Press