CC.OO. denuncia o gasto de máis de medio millón de euros no INEGA en encomendas de xestión "fraudulentas"

CC.OO. denuncia "dispendio" de recursos públicos no Instituto Enerxético de Galicia (Inega) con encomendas de xestión "fraudulentas" por máis de medio millón de euros. Nun comunicado, o sindicato sinala que o Inega encarga encomendas de xestión a 15 persoas, que equivalen case á metade dos traballadores cos que conta o ente público (33).

Segundo expón, todas estas encomendas son a través de Tragsa e ascenden a un total de 528.619,08 euros, cun custo medio por traballador de algo máis de 35.000 euros. Pon de exemplo que o plan renove de electrodomésticos, que antes se facía con persoal propio, supón unha encomenda a sete persoas durante cinco meses por uns 75.000 euros.

A isto únense outras encomendas: desenvolvemento de aplicacións para xestión de axudas (catro persoas e custo de máis de 173.000 euros); control de certificacións enerxéticas de vivendas (tres persoas e case 110.000 euros); plan de axudas para compra de vehículos, que antes se facía con persoal propio e agora destínase a tres persoas por máis de 75.000 euros; e o apoio técnico á Axenda Galega de Transición Enerxética 2021-2030 (dúas persoas e máis de 95.000 euros).

Para FSC-CC.OO., estas prácticas demostran que o Goberno de Alberto Núñez Feijóo continúa "impulsando a súa propia administración paralela". O sindicato lembra que o Consello de Contas recomenda non empregar este sistema de contratación de servizos como medio recorrente para suplir carencias de persoal propio.

inega | Fonte: wikipedia