É máis difícil aprobar 2º de Bacharelato en Galicia que no resto de Comunidades?

A Confederación de Anpas Galegas volve cargar contra as medidas da Consellería de Educación da Xunta de Galicia. A área autonómica comandada por Román Rodríguez volve estar no punto de mira das asociacións de nais e pais, que, tras varios meses de moderada calma, veñen de dirixir un escrito á Consellería para facer notar a situación de “desigualdade” á que, ao seu ver, está sometido o estudantado de segundo de bacharelato en Galicia.

A cuestión denunciada pola Confederación de Anpas Galegas estribaría nunha diferenza de regulación entre o Goberno Central e a Xunta que, de acordo coa súa versión, implicaría que aprobar o bacharelato fora máis difícil en Galicia que noutras comunidades españolas. Dende as Anpas ligan esta problemática á dinámica de “improvisación” que, segundo subliñan, impera na Consellería de Educación no que á xestión da pandemia refire. 

Así, a Confederación subliña as dificultades deste “curso estraño” no que o estudantado se viu prexudicado “polas circunstancias” pero tamén “pola improvisación desta consellería”. A problemática, segundo apuntan, tería afectado en especial á rapazada deste derradeiro curso antes do ensino superior, que, segundo a normativa galega, tería que aprobar todas as súas materias para poder promocionar. 

A contradición legal comeza co Real Decreto-lei 31/2020 do 29 de setembro, co que o Goberno central impulsa medidas “urxentes”, segundo as Anpas, para adaptar o curso á pandemia. O cambio máis importante neste eido estaría en que a repetición do ano académico pasaría a ser considerada unha medida “excepcional” e que tan só tería lugar no caso de que a media de todas as materias fora menos que 5 e así o dispuxese o equipo docente. É dicir, que se podería aprobar con materias suspensas.

O CASO GALEGO

Pero a regulación galega é distinta. Porque a Xunta, unhas semanas máis tarde, validou un decreto do verán anterior no que mantiña a obrigatoriedade de ter aprobadas todas as materias do primeiro e segundo curso que conforman o ciclo. Unha circunstancia que dende as Anpas ven discriminatoria en tanto que, de cara ás vindeiras semanas de fin de curso, podería levar á conformación de dúas varas de medir con graos distintos para estudantes galegos e doutras CCAA.

“[Os estudantes de 2º de BAC] foron quen máis sufriron os recortes de períodos lectivos, do pasado curso, mesmo do principio deste; e por riba agora son quen están vendo reducidas as súas posibilidades reais por culpa dunha discrepancia política que non debera afectalos”, conclúen.