O BNG urxe ao Goberno a incluír a parada de Vilagarcía no novo tren directo Vigo-Madrid
Néstor Rego reclama tamén a mellora das conexións e a recuperación de frecuencias suspendidas durante o estado de alarma.
Por Europa Press / Redacción | SANTIAGO DE COMPOSTELA | 07/06/2021 | Actualizada ás 13:51
O deputado do BNG no Congreso, Néstor Rego, reclamou ao Goberno central que incorpore a parada de Vilagarcía de Arousa no novo tren directo que conecta Vigo con Madrid. Así mesmo, a organización frontista apela á urxencia de mellorar as conexións e recuperar todas as frecuencias suspendidas durante o estado de alarma, indica nun comunicado.
Sobre esta cuestión, afirma que o anuncio de Renfe "deixa fóra a parada de Vilagarcía de Arousa na conexión de Vigo a Madrid, o que afectará de maneira grave á mobilidade e ao desenvolvemento económico de toda a comarca do Salnés". Ademais, argumenta que a decisión de suprimir a parada de Vilagarcía "só reduce o tempo do traxecto en cinco minutos".
"É necesario que Renfe e o Ministerio de Transportes, Mobilidade e Axenda Urbana rectifiquen para non excluír a parada na capital arousá dentro dese novo traxecto que unirá Vigo e Madrid a partir do 14 de xuño" reivindica o deputado nacionalista.
O BNG confirma a presentación de iniciativas instando o Goberno central "a rectificar para manter a parada en Vilagarcía tamén no novo servizo". "Lograríase así que a vila contase con dúas frecuencias", remarca.
