O pleno da Deputación de Ourense aproba unha modificación do orzamento por máis de 36 millóns con tensión
Democracia Ourensana cuestionou se os partidos da oposición teñen "a síndrome de Estocolmo". "Danvos cousas para os vosos pobos e non sei se padecedes a síndrome de Estocolmo, porque estades adoitados a que non vos desen nada", esgrimiu Rafael Cachafeiro, portavoz da formación.
Por Europa Press / Redacción | OURENSE | 26/04/2024 | Actualizada ás 19:26
O pleno da Deputación de Ourense aprobou na súa sesión ordinaria do mes de abril unha modificación do orzamento provincial por un importe de máis de 36 millóns de euros, 23 dos cales corresponden a suplementos de crédito e o resto a créditos extraordinarios. Entre os principais datos que figuran no documento e no referido á cooperación cos concellos, destacan máis de 3 millóns destinados ao Plan CooperOU, o Plan de Cooperación provincial que alcanza así os 17 millóns de euros previstos para este ano.
Tamén figuran 5,9 millóns de euros en axudas nominativas para todos os concellos da provincia, aplicándose criterios de poboación para a súa repartición. As entidades locais de menos de 1.000 habitantes recibirán 50.000 euros, entre 1.000 e 5.000 habitantes, 60.000 euros, e os de máis de 5.000 habitantes, 70.000 euros. Destinaranse, ademais, 440.000 euros para gastos de funcionamento e proxectos en materia de cooperación coas mancomunidades de municipios da provincia.
En canto á colaboración coas entidades, a modificación recolle 3,5 millóns de euros para unha vintena de entidades sociais, culturais e do ámbito económico entre outros colectivos, así como entidades deportivas e clubs de altas competicións. Así mesmo, fai referencia á propia actividade da institución provincial cunha ampliación do programa de mantemento e mellora de vías provinciais cuxa dotación económica pasa de 1,5 a 4,5 millóns de euros.
A modificación foi aprobada grazas á abstención do Partido Socialista e do Bloque Nacionalista Galego, e coa negativa de Democracia Ourensana. O portavoz dos nacionalistas, Bernardo Varela, valorou positivamente a repartición das subvencións nominativas, que cre que "aínda son mellorables". "Agora chegan a todos os concellos con independencia da cor política", subliñou.
Pola súa banda, o portavoz do PSOE, Álvaro Vila, tamén enxalzou a repartición con independencia do partido que goberna en cada concello, algo que distinguiu da anterior etapa na deputación con Manuel Baltar á fronte. "Agora temos 22,8 millóns de euros a repartir de forma equitativa e solidaria entre todos os concellos", engadiu.
Por contra, Democracia Ourensana cuestionou se os partidos da oposición teñen "a síndrome de Estocolmo". "Danvos cousas para os vosos pobos e non sei se padecedes a síndrome de Estocolmo, porque estades adoitados a que non vos desen nada. Agora danvos algunhas cosillas, e xa dicides 'Deus, que bo é o presidente'", esgrimiu Rafael Cachafeiro, portavoz da formación.
O presidente provincial, Luís Menor, concluíu o debate cun agradecemento ao clima de diálogo para, "desde perspectivas políticas atopadas", "ser capaces de chegar a puntos de acordo que permitan que a provincia avance". Con todo, si lle reprochou a Democracia Ourensana que "oxalá onde eles gobernen", é dicir, no concello de Ourense, "puidese haber este clima e favorecésese o avance da cidade".
Así, defendeu que na deputación búscase o acordo "entre todos nos grandes temas" porque o PP é consciente de que goberna en minoría, o que contrapuxo ao concello, onde Menor considera que, a pesar de gozar dunha "minoría máis acentuada", o goberno de Gonzalo Pérez Jácome "non se dedica a falar absolutamente con ninguén".
