Por gcdeportes | Compostela | 17/11/2013 | Actualizada ás 21:50
Trala alarma pola suspensión do fútbol para 30.000 rapaces galegos, todo quedou arranxado coa reunión entre o secretario xeral do Deporte, José Ramón Lete, e o presidente da Federación Gallega de Fútbol, José García Liñares. Segundo informou a compañía aseguradora á mesma Xunta, a cobertura para o fútbol entrou en vigor o pasado venres, sen interrupción algunha dende o inicio da tempada 2013-14 ata o final da mesma. A Secretaría Xeral para o Deporte destina ao convenio 300.000 euros. A compañía aseguradora será a partir de agora Zurich Insurance PLC SUC.
A Federación Gallega de Fútbol decidira o domingo suspender todas as competicións e adestramentos do fútbol base ata novo aviso pola negativa da Xunta a seguir aboando o seguro dos nenos como o facía ata o de agora. A decisión afectaba ás categorías cadete, infantil, alevín, benxamín e pre-benxamín, todas excepto os xuvenís.
A secretaría xeral para o Deporte decidiu mudar o sistema e separar o fútbol, con moita máis sinistralidade en forma de lesións, do resto das modalidades deportivas. A Xunta abonaría 300.000 euros á Federación de Fútbol para que este organismo buscase a mellor oferta. A versión da Federación apareceu na súa web www.futgal.es: “Con motivo de la exclusión de la modalidad del fútbol de la prórroga del seguro deportivo del programa Xogade por parte de la Secretaría Xeral do Deporte da Xunta de Galicia, se paraliza cautelarmente toda actividad futbolística (competición y entrenamientos) de las categorías implicadas en el mismo, que son cadete, infantil, alevín, benjamín y prebenjamín”.
Trala reunión, Lete Lasa aclarou a postura da Xunta: "A Federación Galega de Fútbol é coñecedora dende hai uns meses de que o seguro deportivo da súa modalidade en Xogade sería cuberto por un seguro que a propia Federación debería de concertar directamente --para o que a Secretaría Xeral para o Deporte lle destinará, vía convenio, 300.000 euros-- e non a través do xenérico contrato de seguro que a Secretaría Xeral para o Deporte subscribe directamente para o resto de modalidades deportivas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.