O BNG esixe que se tramite xa o traspaso da AP-9 e chama aos deputados galegos a urxir o debate
Rego cita para o mércores aos parlamentarios electos por Galicia de todos os grupos para urxir á Mesa que leve a cabo o debate.
Por Europa Press / Redacción | SANTIAGO DE COMPOSTELA | 14/06/2021 | Actualizada ás 18:53
O BNG denunciou que a tramitación da proposición de lei para a transferencia da AP-9 a Galicia se demora de forma "inxustificada" desde o pasado mes de febreiro, no que foi admitida a trámite polo pleno do Congreso.
Así o denunciou nun comunicado remitido aos medios, no que o deputado do Bloque explica que convocou para o mércores aos deputados electos en Galicia do PSOE, PP e Unidas Podemos para acordar conxuntamente as accións a realizar unha vez concluído e aprobado o traspaso.
A forza nacionalista asegura que, por iniciativa do BNG, a proposición de lei foi aprobada por unanimidade no Parlamento de Galicia e trasladada ao Congreso. Así, apunta que, despois do bloque inicial por parte da Mesa --presidida polo PP-- e do debate no ano 2018 --inconcluso a consecuencia da finalización da lexislatura-- volveu á Cámara baixa o 2 de febreiro de 2021, sendo aprobada a toma en consideración. Ademais, o día 9 de febreiro foi aprobado o procedemento de urxencia para realizar a tramitación.
Con todo, o deputado o Bloque censura que a Mesa prorroga semanalmente o prazo de presentación de emendas ao articulado desde o pasado 22 de febreiro ata a actualidade. "A tramitación e a aprobación desta lei está a facerse esperar demasiado e entendemos que non hai motivo xustificado para a dilación dunha proposición de lei que foi acordada por unanimidade na Cámara galega e admitida a trámite no Congreso por amplísima maioría".
"Cremos que a unanimidade que se produciu no Parlamento de Galicia debe trasladarse tamén ao Congreso para que o conxunto dos deputados e deputadas electos por Galicia reclamemos a tramitación canto antes desta proposición de lei", sinala Rego.
Con este obxectivo, explicou que convocou aos parlamentarios dos outros grupos a unha reunión o mércores, ás 13,00 horas, no Congreso para acordar conxuntamente as accións a realizar para ver concluída e aprobada canto antes a transferencia da AP-9 a Galicia.
