María Pose, do PP, nova alcaldesa de Santa Comba co apoio de dous edís do PSOE

A popular María Pose foi investida este martes como rexedora de Santa Comba ao prosperar a moción de censura presentada polo PP, co apoio de dous edís do PSOE, contra o único edil de Compromiso por Galicia, o xa exalcalde do municipio, David Barbeira.

Nun pleno celebrado no día no que se cumpre o ecuador do mandato municipal, os seis edís do Partido Popular e os socialistas José Antonio Ucha e Cristina Fajín secundaron esta moción de censura, na que os outros catro edís do PSOE abstivéronse. Pola súa banda, Barbeira, único representante de Compromiso por Galicia, votou en contra.

María Pose xa fora alcaldesa no pasado mandato, no que precisamente presentou outra moción de censura contra o socialista José Antonio Ucha, que agora é un dos dous edís do PSOE que facilita que a moción saia adiante.

Tras as eleccións municipais de maio de 2019, nas que os populares se fixeron con seis concelleiros e os socialistas con outro seis, o PSOE subscribiu un pacto co edil de CxG para que este fose alcalde durante os dous primeiros anos de mandato. Segundo o acordo, pasado este período, sería José Antonio Ucha quen asumiría a Alcaldía a mediados de xuño deste ano.

Con todo, noutro pleno municipal celebrado o pasado día 1 de xuño, Barbeira deixou clara a súa negativa a facilitar o bastón de mando ao portavoz dos socialistas, José Antonio Ucha, tras o que os edís do PP e os dous do PSOE rexistraron a moción. E é que, tal e como volveron evidenciar todos os grupos no pleno celebrado este martes a porta pechada, o acordo de goberno estaba roto desde o primeiro día.

"CUMPRIR A VONTADE DOS VECIÑOS"

A primeira en intervir na sesión que posteriormente se expuxo en vídeo na web do Concello foi a popular María Pose, quen asegurou que este martes se cumpriría a "vontade dos veciños de Santa Comba" que hai dous anos "falaron claro cos seus votos" e deixaron ao PP a só cinco votos da maioría absoluta.

"Ao mesmo tempo deixaron ao señor Barbeira moi lonxe de optar a esa cadeira de brazos que tanto lle gusta", afirmou a popular, que acusou o alcalde de protagonizar un "enfrontamento constante" co resto de forzas da corporación durante os seus dous anos de mandato. "Aínda sabendo que só tiña un de 13 concelleiros, creu vostede ser o shériff de Santa Comba", sinalou.

"Vostede tivo a oportunidade de gobernar, pero o experimento non lle puido saír peor", incidiu María Pose, que avanzou que "o primeiro" que fará será "encargar unha auditoría" sobre a xestión do seu predecesor no cargo. "Santa Comba ten que pasar páxina para vivir épocas mellores que estes dous anos pasados e comprométome a tentalo con todas as miñas forzas", dixo.

"O PSOE, O MAIOR ALIADO DO PP"

Pola súa banda, o alcalde saínte asegurou que a moción de censura acordada entre os seis edís do PP e dous socialistas evidencia "o papel de que o PSOE é o maior aliado do PP".

Dito isto, sostivo que o pobo "non quere máis circos", senón "xente seria" que traballe e defenda os intereses dos veciños.

Ademais, sostivo que se alguén incumpriu o acordo de goberno foi o portavoz do PSOE, que "desde o primeiro momento" levo a cabo un "labor destrutivo de oposición contra a súa xestión".

Con todo, asegurou que hai que en "un país libre" hai que "aceptar que as dúas forzas máis votadas, o PP e o PSOE se unan para facer unha moción partidista sen causa xustificada". "Deséxolles moita sorte. Estarei para achegar no que realmente sexa necesario, cunha oposición rigorosa", afirmou.

CRÍTICAS DE UCHA

Pola súa banda, o portavoz socialista José Antonio Ucha acusou o xa exalcalde de "ir de vítima". "Saia por aí e convenza a todo o mundo de que todos van en dirección contraria menos vostede", propúxolle antes de lembrarlle que "un só non pode gobernar".

Así mesmo, sostivo que só hai "un culpable" de que se chegase á moción de censura, e é o propio Barbeira. "Se xestionase ben vostede seguiría de alcalde", sinalou o socialista, que lle lembrou a Barbeira que o PSOE tiña seis concelleiros fronte a "un só" de Compromiso por Galicia".

Por tanto, incidiu en que, no momento no que non quixo seguir cos socialistas debería "presentar a súa dimisión" e "non faría falta a moción de censura". "Pero vostede aprendeu mal as leccións de democracia e decidiu como sae de aquí", sinalou.

Por último, asegurou que el non participará no goberno do PP, senón que estará na oposición.