Romay Beccaría substitúe a Fraga na Real Academia Gallega de Jurisprudencia y Legislación
A súa designación foi por unanimidade dos membros.
Por Galicia Confidencial | A Coruña | 29/11/2013 | Actualizada ás 12:42
A Real Academia Gallega de Jurisprudencia y Legislación conta desde este xoves cun novo membro, o ex ministro e ex conselleiro José Manuel Romay Beccaría. O actual presidente do Consello de Estado foi elixido por unanimidade, académico de número da institución, nunha sesión plenaria celebrada para ese efecto baixo a presidencia do maxistrado José Antonio García Caridad.
O académico electo ocupará, ademais, a medalla número 14 desta institución, vacante desde o falecemento do seu anterior titular, Manuel Fraga Iribarne.
Unha carreira que se iniciou no Franquismo
Nado en 1934, Romay Beccaría liocenciouse en 1956 en Dereito pola Universidade de Santiago de Compostela. Tras impartir clases de Dereito Administrativo durante un ano na devandita universidade, obtén unha praza de letrado do Consello de Estado en 1959.
En 1963, baixo a ditadura do Xeneral Franco, é nomeado secretario xeral de Sanidade, cargo no que permanece até 1966. Retoma a súa praza como letrado, até asumir en 1973 a dirección do Instituto de Estudos de Administración Local. Permanecerá poucos meses no devandito cargo, pois en 1974 é nomeado subsecretario de Presidencia, e en 1975 subsecretario de Gobernación. A partir de entón comeza unha ascendente carreira política que o levará a presidir a Deputación da Coruña e a ser nomeado conselleiro de Agricultura, Sanidade e ministro de Sanidad no Goberno de Aznar.
