A V Xornada de Onomástica Galega estudará a orixe de topónimos pontevedreses no Camiño de Santiago
A xornada incidirá no estudo dos nomes de lugares que atravesan as rutas que o conforman da man de especialistas de distintas disciplinas.
Por E.P. | SANTIAGO DE COMPOSTELA | 06/07/2021 | Actualizada ás 19:23
O V Xornada de Onomástica Galega estará dedicada aos nomes dos lugares no Camiño de Santiago. O encontro, coorganizado pola Real Academia Galega (RAG), a Deputación de Pontevedra e o Museo desta cidade, achegará diversas contribucións ao redor da toponimia do primeiro itinerario cultural europeo coincidindo co Ano Santo.
O programa desenvolverase o vindeiro venres 16 de outubro no Edificio Castelao do Museo de Pontevedra. Os interesados en participar presencialmente poden inscribirse a través do correo electronicopublicacions@academia.gal e as sesións emitiranse en directo a través de academia.gal.
A xornada incidirá no estudo dos nomes de lugares que atravesan as rutas que o conforman da man de especialistas de distintas disciplinas.
A evolución dos nomes de Gallaecia e Spania ao longo da Idade Media e os nomes literarios no Códice Calixtino, a presenza da onomástica de Santiago máis aló de Galicia e a aplicación didáctica da toponimia do Camiño nas aulas no CEIP Agro do Muíño e no IES Milladoiro son algúns dos aspectos que se tratarán.
Terminará pola tarde cunha mesa redonda na que se abordarán, desde distintas perspectivas, os estudos toponímicos do Camiño e a posibilidade de que Galicia se constitúa como centro dos estudos toponímicos en Europa.
Anselmo López Carreira, profesor da UNED; Pilar Cagiao e José María Anguita Jaén, da USC; e os docentes de secundaria Sandra Beis Silva, María Carmen Liñares e Xano Cebreiro pronunciarán os relatorios incluídos no programa coordinado pola académica electa Ana Boullón e a académica correspondente Luz Méndez.
A mesa redonda contará coa participación do académicocorrespondiente Gonzalo Navaza, o membro da Academia Xacobea Eduardo López Pereira, a antropóloga do Instituto de Ciencias do Patrimonio (Incipit) do CSIC Cristina Sánchez Carretero e o secretario xeral de Política Lingüística, Valentín García Gómez.
