Por Xurxo Salgado | Compostela | 06/07/2021 | Actualizada ás 22:00
A Xunta de Galicia privatiza o servizo de redes sociais de Turismo de Galicia, a pesar de dispor un amplo gabinete de comunicación. Unha privatización que custará 154.880 euros durante os dous vindeiros anos e que ten como obxectivo por en marcha un conxunto de
estratexias e accións de comunicación dixital coa intención de "manter a sensibilización da poboación galega, nacional, internacional así como aos sectores implicados sobre os valores do turismo en Galicia e o Camiño de Santiago nas redes sociais".
Deste xeito, a empresa adxudicataria xestionará, a partir da súa proposta estratéxica, as redes sociais da Axencia de Turismo de Galicia elaborando contidos (textos, imaxes, vídeo) e "garantindo a súa difusión a través de medios gañados". Ademais, esta empresa deberá realizar obrigatoriamente dúas campañas anuais (catro ao longo de todo o contrato) para promocionar e posicionar o turismo galego: unha con determinados contidos das redes de Turismo de Galicia, e outra, con determinados contidos das redes e o Camiño de Santiago.
Segundo o prego de condicións deste concurso ao que tivo acceso GC, o adxudicatario deberá tamén "vixiar e escoitar" diariamente as conversas nas redes sociais sobre o turismo galego e o Camiño de Santiago. "Terá que interactuar cos seguidores das contas de Turismo de Galicia e demais usuarios, buscando e mantendo conversa sobre os temas de interese para o turismo galego e o Camiño de Santiago, onde sexa citada a entidade ou os valores turísticos galegos e respostando no menor tempo posible ás cuestións e requirimentos dos seguidores e usuarios das redes", apunta.
Todo isto, baixo a supervisión de Turismo de Galicia que, en todo momento, dará as instrucións oportunas para resolver as continxencias que se presenten. Entre as prestacións que terá que realizar a empresa contratada está a elaboración, creación e posta en marcha dun plan estratéxico e de acción para os medios propios da Axencia de Turismo de Galicia, con especial incidencia nas redes sociais, fundamentalmente en Facebook, Twitter,
Instagram e Youtube, tendo en conta a situación actual das mesmas no relativo á contidos e
seguidores.
Ademais, encargarase da xestión das redes sociais, a realización , produción e execución da creatividade das campañas, o mantemento dunha comunidade virtual en torno á Axencia de Turismo de Galicia que inclúa tamén o Camiño de Santiago e o fenómeno xacobeo, así como o Xacobeo 2021-2022 e dos custos e desenvolvemento de dúas campañas de publicidade anuais (catro para todo o contrato) nas redes sociais.
PUBLICIDADE MEDIOS ONLINE
Por outra banda, a Xunta tamén destinará 850.000 euros para impulsar unha campaña de promoción dos recursos naturais, culturais e gastronómicos de Galicia, así como do Camiño de Santiago en particular, nos medios dixitais que operen no ámbito nacional e internacional, "coa intención de manter a sensibilización da poboación así como aos sectores implicados sobre os valores do turismo en Galicia en internet e redes sociais".
A intención é fomentar o turismo nun ano marcado pola pandemia e tentar recuperar o fluxo de peregrinos do ano 2019, cando Galicia recibiu máis de 340.000 camiñantes, o meirande número da súa historia.
"Cabe ter en conta que unha porcentaxe moi elevada dos contidos de promoción e da
comercialización dos produtos turísticos realízanse a través da Internet, polo que é precisamente neste medio onde cómpre desenvolver as accións publicitarias do Turismo de Galicia e do Camiño de Santiago ao obxecto de achegarse directamente aos seus usuarios", destaca o Goberno galego para xustificar este novo gasto en medios.
MILLÓNS EN PUBLICIDADE
Nas últimas semanas o Goberno galego está adxudicando distintos concursos para a realización de campañas publicitarias nos medios galegos es españois. Así, leva xa destinados máis de cinco millóns de euros en promocionar produtos do agro, da pesca e en industria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.