A Audiencia da Coruña limita os días de cárcere sustitutivos de multas en caso de falta de pagamento
O auto estima que "o procedente é adecuar, limitar o cumprimento" do tempo de prisión ao pedido no xuízo pola Fiscalía.
Por E.P. | SANTIAGO DE COMPOSTELA | 13/07/2021 | Actualizada ás 18:03
A Audiencia Provincial da Coruña pronunciouse nun auto respecto da pena de prisión máxima pola que se deben substituír as multas dos condenados que se declaran insolventes. Os maxistrados establecen que, no caso de que se produza a falta de pagamento da sanción económica e, en consecuencia, o xulgado a substitúa por días de cárcere, estes últimos non poden superar a pena solicitada pola Fiscalía no xuízo.
Aínda que na resolución o tribunal analiza o caso dun condutor, o seu criterio é aplicable ás persoas multadas por outro tipo de delitos, entre eles os leves de lesións, ameazas ou coaccións, así como polos delitos de calumnias e inxurias, falta de pagamento de pensións ou danos.
No auto, a Sección Segunda da Audiencia, estima en parte o recurso dun condenado por un delito de condución sen permiso, con agravante de reincidencia, á pena de multa de 2.850 euros.
O condutor non fixo fronte ao pago da sanción, polo que o xulgado substituíuna por unha pena de prisión de 285 días. A Fiscalía, con todo, solicitara no xuízo unha condena menor, en concreto, 180 días de cárcere.
"Se o inculpado aceptase en bloque e no escenario do xuízo oral a pretensión punitiva do fiscal, aínda sen rebaixa algunha consecuente á conformidade, a privativa de liberdade a cumprir sería de 180 días e non os 285", destaca a Audiencia Provincial no auto.
Os maxistrados advirten que, de acordo coa resolución do xulgado, o apelante "acabaríase enfrontando a unha pena certa e real moi superior á solicitada en xuízo, que xa era a máxima prevista na norma para a conduta de condución sen permiso".
Por iso, subliña que "o procedente é adecuar, limitar o cumprimento" do tempo de prisión ao pedido no xuízo pola Fiscalía.
Por iso, estima en parte o recurso do condutor e establece que os días de cárcere polos que o xulgado substituirá a multa non poderán superar os 180, pois, pola contra, quebrantaría o principio acusatorio, xa que sería castigado con 285 días de cárcere, unha pena superior á demandada pola Fiscalía na vista oral.
