Científicos da USC descobren un método para loitar contra o cancro sen danar o resto do corpo

A USC vén de facer un novo avance científico que podería axudar a loitar contra o cancro dunha forma máis eficiente e, sobre todo, menos invasiva. A descuberta vén de ser desenvolta por Investigadores do Laboratorio de Radiofísica da USC. Trátase dun novo modelo de cámara de ionización “ultra delgada”, que segundo apuntan será “chave” para aplicar terapias contra o cancro que non deterioren os tecidos sans.

As cámaras de ionización, apuntan dende a Universidade, son dispositivos que serven para determinar a dose exacta dos tratamentos de radioterapia. O logro do equipo de Radiofísica da universidade compostelán pasa por que esta nova cámara de ionización pode pedir “fielmente” as doses precisas ata taxas “mil veces superiores á dos actuais aceleradores de radioterapia”

“As achegas destes investigadores abren o camiño ao desenvolvemento de terapias de precisión que actúen só sobre as lesións tumorais, minimizando os efectos adversos nos tecidos sans”, aseguran dende a Universidade a respecto das conclusións do equipo liderado polo profesor Faustino Gómez, que desenvolveu esta investigación ao abeiro do proxecto europeo UHDpulse.

“Esta nova modalidade de radioterapia implica a entrega ultrarrápida de radiación a taxas de doses de magnitudes maiores que as usadas na práctica clínica habitual. Deste xeito, téntase erradicar as células cancerosas, protexendo o tecido normal do dano da radiación tanto como sexa posible”, explica Faustino Gómez.