Braga premiará con 8.000€ unha ilustración que represente a cultura do Eixo Atlántico

O concello de Braga lanza un concurso dirixido a ilustradores nacionais e internacionais no que promocionen o patrimonio material e inmaterial do territorio do Eixo Atlántico do Noroeste Peninsular. O premio enmárcase dentro do programa de Braga 2021 - Capital da Cultura do Eixo Atlántico, e distinguirá ao vencedor con 8.000€. 

Os artistas poderán participar ata con tres traballos cunha inscrición a través dun formulario ata o 20 de setembro, e as obras recoñecidas presentaranse nunha exposición e nun catálogo cos traballos dos 15 finalistas. 

O concurso está promovido en colaboración coa Escola Superior de Design do Instituto Politécnico do Cávado e do Ave (IPCA) e coa participación da Asociación Galega de Profesionais da Ilustración.

Con dito premio preténdese descubrir e recoñecer o talento na área da ilustración e intensificar a consolidación desta arte en Braga, en coordinación coas estratexias culturais da cidade, especialmente na organización do "Braga en Risco", evento con creente recoñecemento entre os profesionais da ilustración.