Convocadas axudas por 11 millóns para talleres de emprego e a formación de persoas desempregadas
Unha vez acabe o taller, os alumnos e alumnas teñen a opción de traballar nunha empresa da contorna por un mínimo de tres meses cun contrato a xornada completa.
Por E.P. | SANTIAGO DE COMPOSTELA | 17/08/2021 | Actualizada ás 11:25
O Diario Oficial de Galicia (DOG) publica este martes a ampliación do orzamento dedicado á convocatoria de axudas dos talleres duais emprego para 2021-2022 que se incrementa nun 48%, "o que son máis de 11 millóns de euros para poder resolver o 100% das solicitudes presentadas", informa a Consellería de Emprego.
Así, o programa conta con 34,2 millóns de euros "coa previsión de poder ofrecer formación e un contrato de traballo a case 1.900 persoas sen emprego e poder implementar 94 talleres".
Deste xeito, explica, as persoas desempregadas que participen nestes programas, que desenvolven os concellos, mancomunidades e entidades sen ánimo de lucro do sector forestal, "poden acceder ao longo de nove meses a unha formación de calidade con opción a obter un certificado de profesionalidade e un contrato de traballo".
Ademais, unha vez acabe o taller, os alumnos e alumnas teñen a opción de traballar nunha empresa da contorna por un mínimo de tres meses cun contrato a xornada completa. Para este fin, a Xuntaconcede incentivos á contratación.
