Sindicatos ven "pouco dinámico" o mercado laboral galego

Sindicatos comentaron este venres os datos da enquisa de poboación activa publicada polo Instituto Nacional de Estatística (INE), lamentando o "pouco dinamismo" do mercado laboral galego e pedindo á Xunta que aposte polos servizos públicos.

En concreto, UGT puxo en valor algúns aspectos das cifras do INE, como que continúa aumentando o número de empregos indefinidos, "o que permite que haxa unha maior seguridade laboral nos empregos", reivindicando novamente a redución da temporalidade debido, ao seu xuízo, pola última reforma laboral.

Nun comunicado, a organización sindical advertiu dos "retos" aos que se enfronta Galicia este 2024 en canto ao traballo refírese. "É o momento de enfrontar os desafíos pendentes", reivindicou UGT, subliñando o "pouco dinamismo" do mercado laboral galego, cun 53,18% de taxa de actividade, fronte ao 58,63% do total de España.

Entre os obxectivos para este ano, están o de reducir os parados de longa duración, que seguen en valores "moi altos", con 43.100 persoas. Tamén é "fundamental" para UGT que se reformen as políticas activas de emprego e que se incrementen os recursos do SEPE, para que se poida levar a cabo unha orientación laboral personalizada que mellore a empregabilidade dos parados.

Pola súa banda, CC.OO. tamén volveu a pór en valor a reforma laboral, asegurando que "segue reducindo a temporalidade". Con todo, o sindicado criticou a destrución de emprego na Administración autonómica, polo que lle esixiu á Xunta unha aposta polos servizos públicos.

En palabras da secretaria de Emprego de CC.OO., Maica Bouza, iso significaría "emprego de calidade". "Temos que consolidar as conquistas conseguidas e seguir reivindicando máis e mellores empregos, de calidade, con mellores salarios e máis seguros", engadiu.

Decenas de persoas durante unha manifestación polo Día Internacional dos Traballadores, a 1 de maio de 2023, en Vigo | Fonte: Javier Vázquez - Europa Press