Os afectados polas preferentes crean un partido político
Chámase Partido de los Perjudicados por las Preferentes (PPPr) e está dirixido polo exabogado de Ruiz Mateos. Ademais da devolución das preferentes, piden que o Estado asuma as competencias das autonomías.
Por Galicia Confidencial | Compostela | 19/01/2014 | Actualizada ás 09:00
Algúns dos integrantes das plataformas de afectados polas participacións preferentes decidiron, finalmente, dar un paso máis adiante nas súas protestas contra bancos e gobernos e acaban de constituir un novo partido político co obxectivo de que as súas reivindicacións sexan escoitadas dentro das propias institucións.
O Partido de los Perjudicados por las Preferentes (PPPr) está integrado por afectados de varias plataformas de afectados; Plataforma de Afectados Bankia, Plataforma afectados Nova Caixa Galicia, Plataforma afectados CAM, Caixa España-Duero Banco CEISS e Plataforma de afectados e Afectados Caixa Cantabria-Liberbank.
Liderado polo exabogado de Ruiz-Mateos
Detrás desta nova marca política está Joaquín Yvancos, que foi o abogado do empresario José María Ruiz-Mateos durante dúas décadas e tamén representa os intereses de particulares que presentaron demandas en casos como os de Marsans, Pescanova ou Nova Rumasa, entre outros.
A nova formación pretende participar nas próximas eleccións europeas que se celebran en maio. E Yvancos niso xa ten experiencia; xa organizou a candidatura europea coa que se presentou José María Ruiz-Mateos en 1989 (Yvancos ía como terceiro na lista) e na que logrou dous escanos.
O seu principal obxectivo é "conseguir unha lexislación xusta que permita a recuperación dos investimentos de pequenos aforradores en produtos financeiros descoñecidos para eles que foron contratados con abuso de confianza e malas artes por parte das entidades emisoras", sexan preferentes ou subordinadas.
Reforma do Estado das Autonomías
Sen embargo, esta nova formación tamén persigue outros obxectivos que nada teñen que ver coas súas reivindicacións orixinais e que asemellan as de outras nova formación, Vox, integrada por membros das asociacións de vítimas contra o terrorismo e que dirixe José Ortega Lara.
Así, apostan por unha "modificación da lexislación penal para garantir o cumprimento íntegro das penas, sen beneficios penais a asasinos e violadores" e propón a "reforma do Estado das Autonomías, asumindo o Estado as competencias de educación, sanidade e xustiza actualmente transferidas ás Comunidades Autónomas".
