O BNG rexeita o teito de gasto da Xunta e denuncia novos recortes nos servizos públicos
Noa Presas critica que o proxecto do Goberno de Rueda é “insuficiente, non ambicioso e tapadeira do verdadeiro problema: o financiamento autonómico”.
Por Europa Press / Redacción | Santiago de Compostela | 03/08/2025 | Actualizada ás 13:48
A deputada e portavoz de Facenda do BNG no Parlamento, Noa Presas, anticipou este domingo o "non rotundo" da formación nacionalista ao proxecto de teito de gasto presentado polo Goberno de Rueda, que se debaterá este luns no Pleno. Un proxecto que, tal e como criticou, "non é nin ambicioso, nin histórico nin expansivo".
Pola contra, asegurou que traerá consigo "novos recortes dá prestación de servizos públicos no País". Ademais, Presas avanzou como outra das razóns do seu voto en contra, "o uso que o PP fai do teito de gasto como unha performance ou unha tapadeira para ocultar que a negociación importante que hai neste momento é loitar por un sistema de financiamento mellor para Galicia".
"A pesar de que o PP presume dun aumento no teito de gasto de 223 millóns de euros, isto suporá só un 1,6 % máis, cando a inflación, o custo de vida, subiu un 2,7 % ao longo do pasado 2024. Isto significa que hoxe prestar servizos é máis caro e, por tanto, a Xunta vai ter menos recursos para facelo", sinalou Presas.
Neste contexto, o BNG criticou "a submisión e o servilismo de Rueda ás directrices que lle marca o PP de Madrid desde Xénova, negándose a negociar de maneira bilateral co Estado a reforma do sistema actual de financiamento".
Por todo iso, os nacionalistas anunciaron nunha nota de prensa que "dirán non á proposta de teito de gasto do PP e si a propostas que melloren o orzamento futuro para Galicia, mellorando a vida da xente".
"Hai que ir a correccións básicas", apuntou a portavoz de Facenda do BNG que, entre outras cuestións, propón destinar un 1% do orzamento da Xunta á loita contra a violencia machista, ou "rescatar" a atención primaria destinando o 25 % dos orzamentos.
Ademais, o BNG considera "imprescindible" a posta en marcha de novas medidas de apoio aos sectores económicos "nun contexto de incerteza, impulsando por exemplo un plan de choque ante as consecuencias que vai ter a política arancelaria dos Estados Unidos".
