Besteiro acusa ao PP de inacción fronte aos incendios en Galicia

O secretario xeral do PSdeG, José Ramón Gómez Besteiro, afirmou este sábado en Riós que "cada hectárea queimada leva a firma da inacción do Partido Popular". Fíxoo no acto de clausura da xornada 'A Galicia que Arde', primeira sesión do ciclo 'Diálogos con raíz', que comeza a súa nova edición centrada nos incendios forestais.

Besteiro sostivo que os lumes "non son unha maldición inevitable nin unha tradición do verán", senón "o resultado da inacción política, do abandono do territorio e da falta dunha estratexia seria para o monte". Reclamou cambios profundos nas políticas forestais e insistiu en que "non basta con chegar a apagar incendios; hai que actuar todo o ano, investir en prevención, garantir contratos estables e facer do monte galego un espazo vivo, produtivo e coidado".

O dirixente socialista acusou á Xunta de "pretender pasar páxina cada setembro" con anuncios que cualificou de improvisados. "Galicia merece algo mellor que propaganda institucional mentres o país quéimase. É hora de pór a terra no centro da política", engadiu.

Durante a súa intervención, o secretario xeral do PSdeG fixo referencia ao despoboamento do rural galego, especialmente en Ourense. "Nos últimos 50 anos perdéronse máis de 140.000 habitantes e só nas dúas últimas décadas desapareceu o 30% da capacidade agraria e gandeira da provincia", sinalou. Asegurou que este fenómeno está vinculado á falta de planificación e de políticas de futuro para o territorio.

O encontro reuniu a máis de medio cento de asistentes e contou cun panel de especialistas en materia forestal, ambiental e social. Interviron, entre outros, o profesor da Universidade de Vigo Juan Picos, o bombeiro da BRIF de Laza Cristóbal Medeiros, a gandeira Mariña Vaz, o presidente do Instituto Galego de Terras en Man Común Claudio Quintillán, o representante de Unións Agrarias Jacobo Feijóo e a presidenta da Asociación de Enxeñeiros/as Forestais da Xunta Raquel Carreira.

A sesión foi conducida polo secretario provincial do PSdeG en Ourense, Álvaro Vila, e pola deputada autonómica Carmen Dacosta, que moderaron as intervencións e facilitaron o diálogo co público.