A secretaria xeral do PPdeG non ve "xenocidio" en Gaza: "Estou co Rei que falou de masacre"

A secretaria xeral do PPdeG, Paula Prado, rexeitou falar de "xenocidio" sobre a situación que se vive en Gaza. Fíxoo, a preguntas dos xornalistas, nun acto con membros do partido na Coruña e cuestionada se comparte as palabras do presidente de Andalucía, Juanma Moreno, que recoñeceu o "xenocidio" de Israel.

"Estou máis preto das palabras do rei de España que falou de masacre e do fin da guerra". Ademais, rexeitou falar de conceptos que, ao seu xuízo, "dividen ou poden dividir". "Hai que falar do que nos une, que todos queremos o fin desta guerra".

Preguntada se se refería a xenocidio ao aludir ás palabras que dividen, respondeu que "Pedro Sánchez é un experto en dividir e en polarizar a sociedade". "Utiliza o conflito de Gaza para polarizar a sociedade e o que nos une é que finalice esta guerra, este masacre".

Ademais, asegurou que "tan vítimas son as de Gaza como as dos terroristas de Hamás". "Non imos distinguir entre vítimas de primeiro e segunda, todas son vítimas", asegurou sobre a postura nas filas do PP. "Hai que utilizar as palabras con criterio e rigorosidade", expuxo tamén.

PSdeG

O portavoz da Executiva do PSdeG, Xullo Torrado, ironizou con que o PPdeG debía pensar no emérito ao mostrar o seu acordo co discurso do rei de España, Felipe VI, sobre o masacre en Gaza: "Cando o PP di que se parece o rei, probablemente estean a pensar no emérito, co que probablemente compartan bastante opinión sobre Palestina, sobre os países que non respectan os dereitos humano e en política fiscal".

Así o expresou Torrado este venres en referencia a declaracións do portavoz do PPdeG no Parlamento, Alberto Pazos, que asegurou que tanto o seu xefe de filas e presidente da Xunta, Alfonso Rueda, como o partido e o Goberno autonómico, están "no mesmo lugar que o rei de España e a maioría de gobernos europeos", en referencia a se a formación condena "o xenocidio" en Gaza.

A postura do PSdeG é similar en relación aos ataques ao futuro centro para menores migrantes proxectado pola Xunta en Monforte de Lemos, pensado para albergar a aqueles que o Goberno recoloque desde Canarias, Ceuta e Melilla. Torrado criticou ao PPdeG por "desprezar tibiamente" o sucedido na madrugada do sábado e non facelo con "palabras moi fortes".