O PP denega a moción do BNG na Deputación de Ourense para condenar o xenocidio en Gaza: "Iso debe recoñecelo a Corte Penal"

O voto en contra do PP denegou a moción presentada polo BNG de Ourense no pleno da Deputación de Ourense para condenar o xenocidio cometido por Israel contra o pobo palestino --con voto a favor do PSdeG á proposta e abstención de Democracia Ourensana--. A sesión comezou cun minuto de silencio para "condenar os crimes en Gaza". Entre as principais demandas, o grupo nacionalista provincial pedía tamén "vetar a contratación pública con empresas relacionadas ao Estado de Israel", "non manter contactos, encontros ou intercambios con ningunha institución israelí", ou "apoiar a campaña de boicot, desinversiones e sancións contra Israel".

O portavoz provincial do Bloque, Bernardo Varela, acusou ao PP de que "se mantén en posicións negacionistas", ademais de que o Estado "se nega a romper relacións con Israel". Incide na importancia da "presión popular" para "favorecer a tomar medidas". "Eu creo que temos moito que dicir, non pode ser que sigamos de costas á realidade", engadiu. Pola súa banda, o grupo popular en Ourense incidiu en que a administración provincial "non ten competencias nesta materia", recalcou que si piden o "cesamento do fogo" e defenden a "axuda humanitaria", pero que "esta moción non resolve nada". "Realmente imos conseguir algo con isto?", engadiu a portavoz popular, Patricia Torres.

Nesta liña, Torres lembrou o minuto de silencio que abría o pleno, argumentando que o grupo de goberno "si pide paralizar o conflito" e "recoñece os crimes" e "a barbarie", pero destacou que o termo "xenocidio" é un "termo xurídico" que "debe recoñecer a Corte Penal Internacional". Ante a intervención popular, o PSdeG provincial destacou que defender "unha postura recoñecida como xusta a nivel mundial merece que se trate en pleno" e acusou ao PP de "practicar a técnica do escurantismo" ao "pechar os ollos ante a barbarie". "O PP mantense en dicir 'non nos gusta o que está a pasar', a súa morneza é inaceptable", lamentou o deputado provincial socialista, Xosé Carlos Valcárcel.

"Parece que hai dúas varas de medir, unha en Rusia e Ucraína, e outra en Palestina e Israel", engadiu Valcárcel, e incidiu, ademais, en que a "responsabilidade moral e política" tamén "é de quen cala e evita chamar ás cousas polo seu nome" e acusou a "a ultradereita" de "recorrer á inacción". Nesta liña, nacionalistas e socialistas coincidiron en que "as palabras moven conciencias e posicións" e recalcaron que "non hai tempo para medias tintas e eufemismos". "As escusas están esgotadas para a dereita, España escolleu o camiño correcto", engadiu Valcárcel. Pola súa banda, o portavoz provincial de Democracia Ourensana, Rafael Martínez, destacou que a moción veu como unha forma de "publicidade das desgrazas alleas" e apuntou ao Goberno central por un decreto para o embargo de armas que "chega tarde" e "non é realmente un embargo de armas".

"Sodes unha cuadrilla de hipócritas, non vengais aquí a vender a vosa caridade", engadiu. Martínez mantivo que "Netanyahu e o seu goberno están a cometer un xenocidio", pero engadiu que "non se pode culpar a todos os xudeus" e acusou ao BNG de ser "sionistas en certa forma" ao definir o sionismo como "un movemento político nacionalista, neste caso, xudeu". Pola súa banda, o presidente da Deputación insistiu en que o PP "se remite ao aprobado na Fegamp", recalcou que "ninguén está de acordo co terror e o masacre" e acusou a nacionalistas de "centrar as cuestións nun termo" (xenocidio) e a socialistas de "aproveitar unha cortina de fume" ante "os membros do partido sentados no banco".

SUSPENSIÓN DAS REGRAS FISCAIS

Con todo, o pleno aprobou a moción do PP ourensán para "eliminar ou flexibilizar" as regras fiscais para todos os Concellos "dada a grave situación económica que padecen", "agravada recientemene" na provincia "debido aos incendios forestais". En concreto, a moción contou co voto favorable de PP, BNG e DO, que a catalogaron como unha "proposta xusta" ante un "problema real", pero foi rexeitada polo PSdeG de Ourense, cuxo portavoz, Álvaro Vila, lamentou que populares "usen o argumentario dos incendios" para "reclamar flexibilidade nas regras fiscais" e catalogouno como "un esforzo de silenciar voces críticas" tras os lumes.

Vila incidiu en que o grupo socialista "está de acordo coa suspensión de regras fiscais", pero incidiu en que "non participarán" nunha moción que busca "blanquear os incendios". Neste sentido, o protavoz provincial nacionalista recalcou que "valorar esta proposta non é valorar a xestión dos lumes do PP" e subliñou que os incendios son "un reforzo desa necesidade" de que os municipios "poidan facer uso dese remanente de tesouraría" que "boa falta fai a todos os concellos".

CONTROL DE AUGAS NO ENCORO DAS CUNCHAS

Tamén foi aprobada a moción proposta polo PSdeG para "garantir o control rigoroso da calidade das augas de abastecemento" nos municipios afectados pola contaminación no encoro das Cunchas e o "cumprimento estrito das competencias municipais". Unha moción que foi aceptada coas emendas presentadas polo BNG, que pediu "executar" e "cumprir" a sentenza do TSXG que condenou á Xunta e á Confederación Hidrográfica Miño-Sil pola súa "inactividade" ante a "degradación ambiental" do encoro das Cunchas e por vulnerar dereitos fundamentais dos veciños.

Neste sentido, o portavoz de DO, Rafael Martínez, insistiu en que a "sentenza histórica" que partía dunha denuncia "presentada por sete veciños a título persoal", condenaba a Xunta e CHMS, "gobernadas por PP e PSOE respectivamente", e defendeu que a Deputación "xa está a facer o que marca a lei". Pola súa banda, o PP provincial afeou unha moción "confusa" e "con inexactitudes", insistiu en que a coordinación "non lle corresponde á Deputación", senón "á autoridade sanitaria" e pediu "dirixirse máis" á Confederación Hidrográfica Miño-Sil. "Afirmar que a Deputación non cumpre coas súas obrigacións é falso, a Deputación actúa e cumpre na súa competencia", engadiu.

OUTROS ASUNTOS

Ademais das cuestións anteriores, a sesión ordinaria do pleno aprobou por unanimidade a delegación na administración provincial das competencias de xestión, liquidación e recadación do Concello de Barbadás, a modificación das bases de execución do orzamento vixente, ou a desinganción de Emilio Luís Díaz como novo representante do Consorcio Provincial contra Incendios, en substitución de Aurentino Alonso. Así mesmo, o pleno aprobou tamén a adhesión da administración provincial ao marco de colaboración entre Consellería de Medio Ambiente e Cambio Climático e os Sistemas de Responsabilidade Ampliada do Produtor (SRAP) de residuos electrónicos, domésticos e en materia de pilas; e a moción presentada por Democracia Ourensá para "recuperar e manter" os "Camiños de Carro" de Ourense, coa abstención de PP, PSdeG e BNG.