O pleno da Coruña insta ao Goberno a condonar a débeda do porto

O pleno da Coruña aprobou unha emenda, acordada entre PSOE, Marea Atlántica e o PP, sobre a folla de ruta para o futuro deseño da fachada marítima. O acordo insta o Goberno central a condonar a débeda do organismo portuario ou conceder unha axuda equivalente aos préstamos concedidos á Autoridade Portuaria, apuntan desde o goberno local. Tamén a constitución dun consorcio para a xestión dos terreos portuarios que se desafecten "asegurando a súa titularidade e control público".

"No que o Concello da Coruña teña garantida a participación suficiente para coordinar a súa planificación e execución", explican desde o consistorio sobre o acordado na sesión plenaria. Ademais, deuse luz verde a que calquera convenio ou protocolo que se poida formalizar en relación cos terreos portuarios sexan ratificados polo pleno.

No debate desta cuestión, o concelleiro de Urbanismo, Juan Manuel Díaz Villoslada, apelou ao consenso entre os grupos políticos e as administracións. Tamén argumentou que o goberno local non renuncia a reclamar a condonación da débeda, pero tampouco a buscar outras alternativas que garantan a viabilidade financeira da Autoridade Portuaria.

Destacou que o concello debe participar na adquisición do chan portuario que se vai desafectar, "porque debemos garantir a titularidade pública do mesmo".

Mentres, a portavoz da Marea Atlántica, María García, argumentou que o PP "defende ao debedor, a Autoridade Portuaria, e o PSOE ao acredor, Portos do Estado. "Nós pedimos que defendan á cidade, nas reunións interadministrativas".

Nun pleno no que se reclamou ao goberno local a negociación dos orzamentos municipais do próximo ano, aprobouse tamén por unanimidade unha moción da concelleira non adscrita, Isabel Faraldo, de Podemos, para declarar á Coruña 'cidade de acollida para persoas refuxiadas afgás'.