Tráfico identifica case un milleiro de tramos e interseccións de risco nos Camiños de Santiago
A DXT pon a disposición dos peregrinos na súa páxina web unha guía na que sinala os puntos conflitivos das rutas xacobeas.
Por Europa Press / Redacción | SANTIAGO DE COMPOSTELA | 16/09/2021 | Actualizada ás 17:28
A Dirección Xeral de Tráfico (DXT) identificou case un milleiro de tramos e interseccións que, por distintas cuestións, supoñen puntos de risco para os peregrinos que realizan algunhas das 13 rutas dos Camiños de Santiago.
Esta información pode agora consultarse nun apartado da páxina web oficial da DXT --caminodesantiago.dgt.es--. Alí, ademais de información e consellos para as persoas interesadas en facer o Camiño, poden consultarse os resultados da análise desde o punto de vista da seguridade viaria dos 7.270 quilómetros que compoñen os 13 Camiños de Santiago recoñecidos.
Destes máis de 7.000 quilómetros, un total de 1.335 transcorren en paralelo a estradas dos que case a metade (636) están considerados de risco. Ademais, 322 dos 1.190 puntos de intersección tamén entrañan perigo segundo os criterios da DXT, que abordou a seguridade destas zonas co foco posto no usuario vulnerable e desde a perspectiva da intensidade do tráfico, a afluencia de persoas ou as características do punto.
Toda esta información, a disposición dos usuarios na web da DXT con redirección á aplicación información Google Maps para a xeolocalización dos puntos conflitivos, foi presentada polo director da DXT, Pere Navarro, nun acto celebrado este xoves no Centro de Acollida ao Peregrino de Santiago que contou coa participación do vicepresidente primeiro da Xunta, Alfonso Rueda, e o alcalde compostelán, Xosé Sánchez Bugallo.
Tanto Aragonés como Rueda e Bugallo destacaron a importancia dunha iniciativa, bautizada 'Camiño de Santiago, camiño seguro', posto que aborda un dos asuntos "máis importantes" para as rutas xacobeas: a seguridade dos peregrinos.
O responsable da DXT puxo o foco en que o obxectivo da acción é "mellorar a información" da que dispoñen as persoas que camiñan ou viaxan a Santiago facendo o Camiño, unha "marca branca que só suma", algo a xuízo de Aragonés "moi difícil de conseguir nos tempos que corren".
Tamén subliñou o afán por facer máis segura a experiencia dos peregrinos o vicepresidente primeiro da Administración autonómica, que lembrou o plan posto en marcha para a adecuación das rutas nalgunhas zonas que transcorrían por puntos "de risco".
Así, Rueda incidiu en que facer dos camiños espazos "seguros" é "unha obsesión", polo que valorou o traballo da DXT, que achega "unha información moi valiosa" que será "de utilidade" para "todos".
