Crise en Teo: o alcalde retira as competencias ao PSOE e queda xunto a tres edís
"Poden ter autonomía e capacidade de decisión nas súas áreas, claro que si, pero a Alcaldía que as nomea ten que estar informada minimamente do que se fai", di ao criticar a desinformación das áreas gobernadas polos socialistas.
Por Europa Press / Redacción | SANTIAGO DE COMPOSTELA | 04/10/2021 | Actualizada ás 12:02
O alcalde de Teo, Rafa Sisto (Son de Teo), retirou as competencias municipais aos seus socios de goberno do PSOE (Uxía Lemus de la Iglesia, Roberto Moñino Gil, Mayte Argibay Silva e José Manuel Elías Noya) e queda só xunto a outro tres concelleiros no goberno municipal.
"Comuniqueilles aos concelleiros socialistas o cesamento nas súas responsabilidades de goberno. Foi esta unha decisión difícil, pero inevitable, que viña xestando desde hai varios meses e que fomos atrasando coa esperanza de poder reconducir a situación", explica o alcalde nun comunicado publicado na web do seu partido.
Na páxina do Concello de Teo pódese consultar a organización realizada: Iria Otero Cepeda será concelleira delegada de Infraestruturas, Administración, Lingua e Mocidade; Xosé Ignacio Igrexas Villar, queda como concelleiro delegado de Benestar, Persoal, Deportes, Participación Veciñal e Servizos Básicos; e María López Álvarez é a concelleira delegada de Educación, Cultura, Igualdade, Mobilidade, Comercio, Turismo e Emprego. O resto das áreas son asumidas directamente pola Alcaldía.
No comunicado na web de Son de Teo, Rafa Sisto sinala que para "poder afrontar un goberno serio e con garantías, precísase lealdade e coherencia". "Lealdade aos pactos que se acordan e lealdade cos compañeiros de camiño", explicou.
"FALLOU" EN TEMAS IMPORTANTES
Segundo apunta, esta cuestión "fallou" en temas "tan importantes" como a xestión compartida dos fondos europeos, o mantemento dunha residencia teatral ou artística e no "respecto" aos compromisos adquiridos polo goberno local na pasada lexislatura e que xa contaban con retencións de crédito para levalos adiante.
Rafa Sisto apunta, así mesmo, que "a coherencia non está enfrontada coa diversidade", pero advertiu de que os concelleiros "actúan por delegación da Alcaldía". "Poden ter autonomía e capacidade de decisión nas súas áreas, claro que si, pero a Alcaldía que as nomea ten que estar informada minimamente do que se fai, entre outras cousas, porque é a responsable última", agrega.
Neste sentido, afirma que as reunións de goberno foron "desde o primeiro momento monólogos" en que a parte de Son de Teo "expuña os proxectos e informaba do feito, mentres que a parte socialista calaba". Tras reivindicar que a súa formación sempre tivo "vontade de sumar", como así o testemuñan seis anos de goberno en coalición, Rafa Sisto recoñece a "dificultade" da situación, por quedar en minoría.
"NOVOS PACTOS"
"Abrimos pois con responsabilidade un período transitorio que debese levar á conformación de novos pactos que dean maior estabilidade ao goberno. Sabemos da nosa capacidade de diálogo e de acordo e non dubidamos de que, dunha ou outra forma, garantiremos apoios maioritarios que permitan executar os retos que temos que afrontar", sentenciou.
Ademais do catro concelleiros logrados por Son de Teo e os outros catro do PSOE, a corporación municipal está conformada por sete edís do PP e dous do BNG, formación política de ámbito máis próximo.
COMUNICADO DO PSOE
A través dun comunicado, os socialistas de Teo sinalan que a decisión do alcalde de cesar aos concelleiros do goberno foi "sen previo aviso". "Dada a multiplicidade de asuntos fundamentais para este concello, como Casalonga, en que a unidade institucional é fundamental, lamentamos a decisión de Rafael Sisto, vinculado ao que entendemos unha estratexia partidista de escaso percorrido, antepondo os intereses do seu grupo en contra dos intereses xerais dos veciños, que nestes tempos máis que nunca pide estabilidade", sinalan.
A portavoz socialista, Uxía Lemus, indicou que "lamentan profundamente" esta decisión, que entenden "vinculada a cálculos electorais, que non á xestión" dos concelleiros. Finalmente, engaden que "seguirán traballando desde a oposición como fixeron ata agora, de forma construtiva e coa institución e os veciños como principio máximo da actuación" dos socialistas.
O PP, OFRÉCESE A GOBERNAR
Pola súa banda, o portavoz do PP de Teo, José Manuel Guerra, reuniu de urxencia ao grupo municipal este luns. Tras iso, e a través dun comunicado, sinalou que a noticia "non é ningunha sorpresa, xa que as discrepancias e a desconfianza mutua entre os edís socialistas e os de Son de Teo eran constantes desde hai bastante tempo".
"A realidade é que este goberno bipartito non funcionou desde o primeiro minuto, operaban como dous gobernos, cada un prol a súa banda, sen ter en conta en ningún momento as necesidades dos veciños", apuntou o portavoz popular, quen se ofreceu a gobernar desde "mañá mesmo", tarefa para a que a súa formación política está "preparada".
Así, Guerra afirmou que o pacto "era unicamente para evitar que o PP gobernase", polo que lle pide ao alcalde que "aparte e deixe gobernar a quen gañou as últimas eleccións municipais", que foi o PP, que ten sete edís.
"Estamos preparados para gobernar mañá mesmo se é necesario", salientou Guerra, quen engadiu que teñen "solvencia e valentía" para afrontar as cuestións que "realmente preocupan aos veciños".
O PP de Teo lembra, ademais, que no caso das concelleiras de Educación e Urbanismo, do PSOE, pediran "de forma insistente o seu cesamento". "Non queremos facer leña da árbore caída, pero o certo é que a edil de Educación non sabía nin cales eran as súas competencias e a de Urbanismo deixou claro hai moito tempo que carecía de proxectos ou solucións para Casalonga", o "principal asunto" encima da mesa.
