Gonzalo Caballero quere contrastar o seu modelo co das "baronías" mediante debates entre os candidatos
O actual secretario xeral do PSdeG e aspirante á reelección comparou as primarias cunha "encrucillada" na que á militancia do PSdeG correspóndelle decidir que camiño quere seguir ao longo do próximos catro anos.
Por Europa Press / Redacción | SANTIAGO DE COMPOSTELA | 06/10/2021 | Actualizada ás 20:10
O actual secretario xeral do PSdeG e aspirante á reelección, Gonzalo Caballero, propuxo debates entre os candidatos a liderar a formación para contrastar o seu "modelo de esquerdas e da militancia" con "outro máis conservador e das baronías" --en referencia ao do seu rival Valentín González Formoso--.
Gonzalo Caballero pronunciouse deste xeito na tarde deste mércores, na que mantivo reunións coa militancia socialista dos municipios pontevedreses de Sanxenxo e A Estrada, uns actos dos que informou a súa candidatura nun comunicado.
Desde alí, o dirixente socialista comparou as primarias cunha "encrucillada" na que á militancia do PSdeG correspóndelle decidir que camiño quere seguir ao longo do próximos catro anos. "Temos que elixir entre un modelo de esquerdas e da militancia e outro máis conservador e das baronías", sostivo antes de sinalar que a "grandeza das primarias" é, precisamente, "confrontar modelos de partido distintos".
"O meu modelo", sinalou Gonzalo Caballero, "sempre foi situar ao PSdeG na esquerda" e "traballar sen resignación e sen descanso" en defensa do progreso para os galegos e as galegas.
Neste sentido, asegurou que, no seu catro anos como secretario xeral, "non houbo unha causa" na que o PSdeG non estivese presente. "Nestes catro anos como secretario xeral nunca baixei os brazos na defensa de Galicia", afirmou.
"As hemerotecas están aí para ver o que fixo cada un en cada momento", remarcou Caballero, que incidiu en que o seu modelo "nunca foi" o de "andar de paseo con Feijóo durante unha campaña electoral".
"Eu teño claro que o PSdeG ten que situarse no lugar que lle corresponde para ofrecer a Galicia unha verdadeira alternativa de esquerdas: ese ten que ser o noso leitmotiv", resumiu o socialista.
Así as cousas, Gonzalo Cabalero avanzou que, cando conclúan os prazos de recollida de avais, proporá a celebración de debates nos que os candidatos poidan expor de forma diferenciada os seus proxectos.
