Investigan un posible exceso de velocidade como causa do accidente no que morreu un mozo na Estrada
Ademais, outros dous mozos resultaron feridos.
Por Europa Press / Redacción | PONTEVEDRA | 11/10/2021 | Actualizada ás 13:03
Un posible exceso de velocidade barállase como causa do accidente de tráfico mortal que na madrugada deste luns no municipio da Estrada se saldou cun mozo falecido e dous feridos, entre eles un menor.
Fontes consultadas por Europa Press, apuntaron que se investiga se o vehículo no que circulaban os tres novos, cuxo condutor faleceu, "ía picado con outro" e con "exceso de velocidade". Pola súa banda, fontes da Garda Civil confirmaron que o condutor do outro vehículo implicado, que resultou ileso xunto a un acompañante, deu negativo no test de alcoholemia e drogas.
Este accidente tivo lugar pasados uns minutos das 2,00 horas deste luns á altura do quilómetro 16,700 da estrada PO-841 ao seu paso pola Estrada cando dous vehículos chocaron de maneira fronto-lateral.
Como consecuencia da colisión o condutor dun dos coches, un mozo de 19 anos veciño da Estrada, morreu e os seus dous acompañantes, un menor e un home de 18 anos, resultaron feridos e evacuados a un centro hospitalario compostelán.
PRECAUCIÓN
Tras este accidente mortal, o alcalde da Estrada, José López Campos, manifestou a Europa Press que se trata dunha "desgraza" e lamentou que había xente "moi nova" implicada.
Por iso, apela a "extremar a precaución" e "sensibilizar" porque, ao seu xuízo, "parece que se perdeu ese medo e respecto a conducir". Por iso, chama a evitar este tipo de "desgraza".
