Debate: Caballero critica que Feijóo se preocupe máis de ser "líder opositor" que "presidente da Xunta"

O portavoz parlamentario do PSdeG observa na Xunta unha "estratéxica análoga" á do líder do PP, Pablo Casado, e á da ultradereita.

Por Europa Press / Redacción | Santiago de Compostela | 13/10/2021 | Actualizada ás 17:20

Comparte esta noticia

O portavoz parlamentario do PSdeG, Gonzalo Caballero, criticou que o titular do Goberno galego, Alberto Núñez Feijóo, se preocupe máis na súa intervención no Debate sobre o Estado da Autonomía de ser "líder opositor" que presidente da Xunta.

O portavoz do PSdeG, Gonzalo Caballero durante o debate do Estado da Autonomía de Galicia, no Parlamento galego, a 13 de outubro de 2021, en Santiago de Compostela
O portavoz do PSdeG, Gonzalo Caballero durante o debate do Estado da Autonomía de Galicia, no Parlamento galego, a 13 de outubro de 2021, en Santiago de Compostela | Fonte: Álvaro Ballesteros - Europa Press.

"Vostede está máis preocupado por ser un líder opositor que por ser presidente, por iso pon Galicia ao servizo dos intereses do PP", sostivo o tamén secretario xeral do PSdeG, que acusou a Feijóo de trasladar unha visión de Galicia como unha "arcadia feliz" na que se esquece de "tantos galegos".

Nun discurso que iniciou dando o pésame aos membros do Goberno galego e do Grupo Popular polo falecemento do conselleiro de Facenda, Valeriano Martínez, Caballero considerou que Feijóo aproveitou o debate para marcar unha "estratéxica análoga" á do líder do PP, Pablo Casado, e á da ultradereita na "escalada da tensión política" para tratar de sacar un Goberno de España "lexitimamente" constituído.

O dirixente socialista, que citou como un éxito da vacinación a próxima saída de Galicia da emerxencia sanitaria, afeou a Feijóo que se esquecese de "recoñecer os seus erros" cando aseguraba que "a estratexia de vacinación era un anuncio grandilocuente" do Goberno, afeou que ao presidente galego lle sirva "calquera tipo de cuestión para facer oposición ao Goberno de Madrid".

"Hoxe non deu unha resposta ou un proxecto de país, preferiu falar a un PP que está na estratexia de conflito para conseguir o Goberno de España", incidiu Gonzalo Caballero, que lle reclamou a Feijóo "altura de medias" e emprazouno a entender "o momento" que se vive.

Convencido de que cada vez que Feijóo "nega as dificultades que hai en Galicia, está a negarlle a verdade aos galegos", Gonzalo Caballero citou problemas como "as listas de espera en Atención Primaria" para soster que "un presidente de Galicia non pode estar a escapar das súas responsabilidades e botando culpas a outros coma se ninguén estivese ao temón".

"12 ANOS BUSCANDO A QUEN BOTAR A CULPA"

Neste sentido, tras lamentar que Galicia estea por detrás doutras comunidades en investimentos en servizos sociais ou en sanidade, Gonzalo Caballero afeou ao presidente que, no "ámbito económico", as súas medidas se reduzan a levar "12 anos á fronte da Xunta buscando a alguén a quen botarlle a culpa do seu deserto industrial".

E é que, segundo sinalou Caballero, se se analiza a política industrial da Xunta, "un folio en branco" é a resposta. "Non hai modelo económico para a Galicia poscovid, vostede deu un discurso inconexo con medidas inconexas", criticou nunha intervención na que acusou o presidente da Xunta de converter Galicia nun "almacén de desastres industriais" polo súa "falta de impulso, de estratexia, de obxectivos e de medidas".

Así mesmo, emprazou a Feijóo a recoñecer que "a súa xestión en materia de fondos europeos é manifestamente mellorable" e afeou que a Xunta teña "a dubidosa honra" de ter que devolver fondos da PAC "por non ser capaz de executalos en prazo".

BUSCAR UNHA RESPOSTA AOS GALEGOS

Fronte a todo iso, Gonzalo Caballero asegurou que "é o momento de dar unha resposta aos galegos" cunha reactivación que debe de ir ao lado do fortalecemento dos servizos públicos, que aposte pola modernización económica e por un modelo de I+D+i que permita unha economía máis vangardista, con capacidade de xerar emprego de calidade.

"Á vez que temos un discurso distinto, porque estamos á esquerda con formulacións distintas, volvémoslles tender a man e volverán decidir se queren decidir o futuro con acordos de país ou seguir ancorados", trasladoulle Gonzalo Caballero, que criticou que o PP "diga que non" ás formulacións que "fan un país máis forte". "Tendemos a man de forma continúa e imos seguir facéndoo porque Galicia necesita de todos", afirmou.

PROPOSTAS E REFORMA DO ESTATUTO

Dito isto, o dirixente socialista si puxo en valor algúns anuncios realizados este mércores polo máximo mandatario autonómico, como a gratuidade das escolas infantís desde o primeiro fillo o próximo curso unha medida que, segundo sinalou, incluía o PSOE no seu programa electoral. "Cando rectifica, empeza a acertar", manifestou.

Tamén aproveitou para emprazar aos grupos a que, unha se supere "o peor da pandemia", se inicie o debate para reformar o Estatuto de Autonomía. "Cremos que ao longo desta lexislatura haberá que adaptar o Estatuto aos novos tempos, para polo ao servizo da xente", argumentou para avogar por incluír neste documento unha "carta de cidadanía" que sirva de garantía para que os galegos teñan os mesmos dereitos en "igualdade".

Ademais, trasladoulle o apoio do PSOE á Xunta para reivindicar un sistema de financiamento autonómico que teña en conta factores como o envellecemento e a dispersión.

"Estaremos a traballar para que Galicia teña o mellor financiamento", sostivo nun discurso no que tamén se mostrou partidario de que as comunidades históricas teñan un "nivel competencial máximo". Todo iso, deixando claro que aos socialistas non lles gusta "o modelo independentista", cuxas alianzas "non traen nada bo".

Por último, tras afear que Feijóo acuda á Cámara a anunciar que "el convida" pero quen pague sexa o Estado, pechou a súa intervención reclamando a Feijóo que use a súa maioría absoluta para "gobernar Galicia". "Xestionan 12.000 millóns de euros e non se sabe que fan. Saquen o diñeiro do colchón", resolveu.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta