Por E.P. | SANTIAGO DE COMPOSTELA | 14/10/2021 | Actualizada ás 13:35
A viceportavoz do Grupo Popular Paula Prado advertiu de que o proxecto de orzamentos xerais do Estado é "dificilmente crible e real" se non "se lle fai unha corrección" á previsión de crecemento. Ademais, advertiu de que as contas, que "non son para tirar foguetes", reservan para Galicia algo por encima do 8 por cento, "un pouco máis altos" pero seguen sendo "un dos peores orzamentos do Estado para Galicia dos últimos 15 anos".
Prado, que acompañou a Miguel Tellado --secretario xeral do partido e viceportavoz-- na rolda de prensa de presentación das propostas de resolución, sinalou que a esquerda "criticaba os orzamentos do PP", a pesar de que os "máis baixos" foron do 9,3 por cento e houbo anos en que chegaron ao 13 por cento (nos que hai que ter en conta investimentos para a alta velocidade). É dicir, subliñou, a media era do 11 por cento, pero agora "parece que temos que tirar foguetes" con estas cifras.
En todo caso, para a dirixente popular "o importante non son as cantidades que se pintan nos orzamentos", senón as que se "executan" e, neste sentido, avisou de que "é moi baixa" a cantidade que se chega a converter en realidade. Así, aínda que dixo que hai que esperar a decembro para coñecer a execución final, "os datos non son moi halagüeños".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.