Dúas firmas galegas desenvolven kits para mellorar o tratamento de varios cancros
A iniciativa, do sistema sanitario andaluz e financiada polos fondos FEDER, actuará sobre o cancro de mama, pulmón e colon.
- Investigadores da USC achan unha nova diana implicada na enfermidade do fígado graso non alcohólico
- PharmaMar recibe aprobación de Singapura para comercializar o seu fármaco para tratar o cancro de pulmón
Por Europa Press / Redacción | SANTIAGO DE COMPOSTELA | 14/10/2021 | Actualizada ás 18:55
As firmas biotecnolóxicas galegas AMSlab e Nasasbiotech desenvolverán un novo proxecto, denominado Biopsia Líquida, que busca solucións, mediante kits non invasivos, para mellorar o tratamento do cancro de mama, colon e pulmón.
Este é unha das primeiras iniciativas asociadas á Compra Pública de Innovación Diagnóstico e Tratamento de Precisión en Enfermidades Infecciosas e Cancro e, impulsado polo Servizo Andaluz de Saúde, pretende "identificar necesidades asistenciais non cubertas" --servizos e produtos avanzados que aínda non están no mercado-- "para que a industria ofreza solucións innovadoras".
O laboratorio lucense AMSlab e Nasasbiotech, con sede na Coruña e especializado no desenvolvemento de solucións clínicas para o diagnóstico, prognóstico e tratamento do cancro --ambas as socias do Clúster Tecnolóxico Empresarial das Ciencias da Vida (Bioga)--, resultaron adxudicatarias a través dunha Unión Temporal de Empresas (UTE) para desenvolver o Proxecto Biopsia Líquida.
A investigación realizará probas de precisión non invasivas que permitan a identificación e caracterización de biomarcadores en sangue para a personalización e monitorización do tratamento a pacientes. O proxecto non só trata de conseguir mellorar o diagnóstico e prognóstico dos pacientes, senón tamén a eficacia das terapias. Isto, sinalan, incidiría "na saúde da persoa afectada pola enfermidade e tamén na sustentabilidade do sistema sanitario".
KITS DIAGNÓSTICOS NON INVASIVOS
Así, Biopsia Líquida pretende obter kits diagnósticos que permitan a identificación e caracterización de biomarcadores en sangue (a través de células tumorales circulantes, CTCs, e vesículas extracelulares,EVs) de forma non invasiva, "facendo posible un seguimento do paciente e a detección precoz de potenciais recaídas, así como a monitorización da resposta ao tratamento dunha forma personalizada".
Ademais, busca alcanzar a validación e establecemento de plataformas innovadoras dunha guía clínica integral adecuada sobre análise de biopsia líquida baseada en biomarcadores sanguíneos (CTCs e EVs), "que irá desde a recollida de mostra ata a decisión clínica".
Esta iniciativa está cofinanciada ao 80% con fondos FEDER procedentes dos Programas de Fomento da Innovación desde a Demanda en Saúde (FID-SAÚDE), que xestiona o Ministerio de Ciencia e Innovación en colaboración coas comunidades autónomas, así como con fondos propios do Servizo Andaluz de Saúde (SAS).
