A Xunta mantén o pulso co Goberno central para que ENCE quede en Pontevedra
Os vicepresidentes primeiro e segundo censuran que o Goberno se negara á adscrición dos terreos da fábrica ao porto de Marín.
Por Europa Press / Redacción | SANTIAGO DE COMPOSTELA | 16/10/2021 | Actualizada ás 15:25
O vicepresidente primeiro, Alfonso Rueda, criticou que o Goberno central se negase a estudar a posibilidade de adscribir os terreos que ocupa a fábrica de Ence ao porto de Marín "sen saber se iso é viable" para tentar solucionar a situación na que se atopan estas instalacións.
En declaracións aos medios, Rueda insistiu en que "a única vía posible a día de hoxe" para manter o emprego é loitar para que a fábrica "permaneza onde está", no seu emprazamento en Lourizán, polo que a Xunta "quere saber se é xuridicamente viable" a adscrición destes terreos ás instalacións do Porto.
Por iso, cre "imposible de entender" que o Estado se negue a esta posibilidade "sen saber se iso é viable ou non é viable" e á espera do ditame do Consello Consultivo que se atopa analizando esta proposta. Neste sentido, censura que se negase "en redondo" aludindo ao resultado dun informe "de hai case 20 anos" e realizado "en circunstancias diferentes" ás actuais, polo que pediu "seriedade" e "ser construtivos" para tentar estudar todas as posibilidades.
Finalmente instou a esperar a que o Consultivo termine o seu ditame, que confía en que sexa "canto antes", e a analizar posteriormente os termos nos que se materializará este informe. Este mesmo sábado, o vicepresidente económico, Francisco Conde, tamén se mostrou sorprendido" pola posición do Goberno, que "non quere admitir a avaliación da proposta dos traballadores e da Xunta" sobre a adscrición dos terreos de Ence ao Porto de Marín.
"Entendemos que por un exercicio de prudencia e compromiso, o Executivo debería esperar a ese ditame para ver se hai viabilidade desde o punto de vista xurídico", indicou. Conde non ve "razoable" que "a mesma avogacía do Estado que se achandou na demanda, agora por unha interpretación dunha situación comparativa de hai máis de 15 anos, se poida tomar ese posicionamento", recalcou, co que, segundo considera, o Goberno segue "coa folla de ruta de pechar Ence".
