O Sergas comezará o reparto das vacinas contra a gripe a covid o vindeiro luns 25

O Servizo Galego de Saúde (Sergas) citará desde o vindeiro luns, 25 de outubro, ás persoas maiores de 80 anos de Galicia para recibir a dose de reforzo contra a Covid-19 --a terceira--, aos que á mesma vez se lles ofrecerá a vacina antigripal.

Así o explicou o conselleiro de Sanidade, Julio García Comesaña, en rolda de prensa este mércores, na que destacou que a partir do 25 de outubro vacinarase nos centros de cabeceira, nos que xa recibiron as dúas doses anteriores, aos maiores de 80 anos unha vez finalizada a administración da de reforzo a 31.793 persoas das residencias sociosanitarias.

Comesaña incidiu en que esta dose de reforzo chega cando en Galicia, na actualidade, máis do 93 por cento da poboación diana está inmunizada e máis dun 94% recibiu polo menos unha dose. O conselleiro insistiu en que Galicia segue co proceso de vacinación contra este coronavirus, ao que se suma agora a dose de reforzo.

Por iso, lembrou que quen non se vacinou ata a data contra a Covid-19 pódeo facer nos puntos de vacinación habilitados nos hospitais a través de autocita ou sen cita. O titular de Sanidade subliñou que os maiores de 80 anos serán citados en centros de cabeceira en Atención Primaria como na vacinación das outras doses a través dun SMS para acudir.

Aos maiores de 80 anos que non acudan ao primeiro chamamento a vacinarse, citaráselles posteriormente mediante chamada telefónica de reforzo que lles fará persoal de enfermaría. Posteriormente, serán os cidadáns de entre 70 e 79 anos os que reciban esa dose de reforzo, que serán citados unha vez que transcorran o seis meses da dose anterior.

Preguntado sobre se para este colectivo recorrerase a centros de vacinación masiva, que previsiblemente se comezará a citar a partir de mediados de novembro, Comeñasa avanzou a posibilidade de que se recuperen esas instalacións en Galicia polo volume de persoas que van coincidir. "O máis probable é que recorramos a centros de vacinación masiva", afirmou, para matizar que neste colectivo xa non se administrará a dose de reforzo contra a Covid xunto coa da gripe, xa que iso "só" ofertarase a maiores de 80 anos, por ser "loxísticas diferentes".

CAROLINA DARIAS

A ministra de Sanidade, Carolina Darias, mantivo este mércores unha reunión de traballo co presidente do Sindicato de Enfermaría (SATSE), Manuel Cascos, ao que recoñeceu o papel desenvolvido polas enfermeiras e os enfermeiros na campaña de vacinación fronte á covid-19 en España.

No encontro celebrado no Ministerio de Sanidade ambos manifestaron a súa disposición a continuar traballando a favor das enfermeiras e enfermeiros do noso país, así como a establecer sinerxías de face a futuras colaboracións.