O PP da Coruña insta ao goberno local a dialogar co resto de grupos os orzamentos e urxe unha baixada de impostos
Rosa Gallego manifestou a necesidade de baixar, entre outros, o IBI ou o imposto de circulación e actividades económicas.
Por Europa Press / Redacción | A CORUÑA | 25/10/2021 | Actualizada ás 12:31
A portavoz do grupo municipal dos populares da Coruña, Rosa Gallego, pediu á alcaldesa da Coruña, a socialista Inés Rey, que negocie e dialogue cos grupos da oposición os orzamentos municipais que están aínda pendentes de aprobar. Así o fixo este luns nunha rolda de prensa na sede do grupo municipal, na que Gallego mostrou a súa preocupación sobre a aprobación dos mesmos, que poderían non levar a cabo a tempo para que algúns impostos entren en vigor o 1 de xaneiro.
A portavoz popular manifestou a necesidade de "baixar impostos" ás familias e autónomos. Gallego considerou que aínda que se baixen os impostos, "pódese dar un bo servizo público aos cidadáns". Por iso, enviaron as súas propostas por carta ao Goberno local.
Entre as proposicións recóllese unha baixada do Imposto sobre Bens Inmobles (IBI), unha baixada do 10% para o imposto de circulación e actividades económicas, unha rebaixa das taxas a familias numerosas e monoparentais, ademais dasPemes e autónomos. Para todos estes colectivos reclámase tamén unha rebaixa do 50% na rede de sumidoiros, auga, depuración e saneamento e recollida de lixos.
MÁIS INGRESOS
Para Rosa Gallego estas medidas non minguarían as arcas municipais, xa que lembrou que o Concello recadou "20 millóns de euros máis" durante a pandemia.
Preguntada pola rolda de prensa que darían o mesmo luns os portavoces de PSOE e Marea, José Manuel Lage e María García, Gallego expresou que "non" sabían "nada", e sinalou que un tema así debe "ser presentado pola alcaldesa", aínda que considerou que "quizais non lle interesa facerse a foto coa Marea e si con Feijóo".
