O comité clínico avaliará unha proposta de Educación para flexibilizar protocolos nos centros escolares
Os expertos do comité educativo recoñecen que unha apertura tería "impacto positivo" para a comunidade escolar.
Por Europa Press / Redacción | SANTIAGO DE COMPOSTELA | 25/10/2021 | Actualizada ás 18:11
O comité que asesora á Consellería de Cultura, Educación e Universidade durante a pandemia da covid-19 en materia escolar ve "adecuado empezar a abordar unha posible flexibilización" dos protocolos sanitarios nos centros, polo que trasladará ao comité clínico sanitario unha proposta neste sentido.
Así o informou nun comunicado a Xunta tras a reunión do comité educativo deste luns, un encontro onde se constatou que a desescalada no ensino debe ser "simétrica e prudente", acorde "coa que se está dando no conxunto da sociedade".
En concreto, trátase de dar "unha adaptación" aos centros dunha desescalada que xa "se está facendo efectiva na sociedade", tendo en conta que Galicia abandonou o pasado venres o estado de emerxencia sanitaria.
"Así pois, dado que a progresiva normalización da situación sanitaria na sociedade en xeral ten o seu reflexo nas aulas, o comité educativo considera adecuado comezar a abordar unha posible flexibilización no protocolo covid escolar", recolle o comunicado da Consellería.
En todo caso, o titular deste departamento, Román Rodríguez, subliñou que dita flexibilización "deberá respectar o marco establecido polas autoridades sanitarias galegas", así como na declaración de actuacións coordinadas entre os ministerios de Sanidade e Educación e as comunidades autónomas.
Os integrantes do comité educativo da Xunta coincidiron en que a apertura tería "un impacto positivo" para o conxunto da comunidade escolar. Por iso, trasladarán ao comité clínico unha proposta para que este órgano sanitario a avalíe.
