Un punto que sabe ben

Ficha técnica
As Palmas: Barbosa; Ángel, Deivid, David García, Dani Castellano; Javi Castellano (Nauzet Alemán, 56'), Apoño; Momo, Valerón, Tana (Aranda, 56'); e Asdrúbal .
Lugo: José Juan; De Coz, Pavón, Jorge, Víctor Marco; Pita, Seoane; Pablo Sánchez (Pablo Álvarez, 45'), Álvaro Peña (Rafa García, 45'), Iván Pérez (Sandaza, 79') e Rennella.
Sen goles.
Árbitro: Vicandi Garrido (vasco). Amarelas a Seoane (77') no Lugo e a Momo (93') nas Palmas.
Incidencias: partido da 28ª xornada da Liga Adelante no estadio de Gran Canaria ante 7.092 espectadores (cifra oficial).

Ledos volven os de Quique Setién cun punto no zurrón. Foron superados polo rival, que tiveron as mellores ocasións, e o meta Jose Juan foi o mellor no campo. Así o recoñeceu Quique Setién ao final do encontro, cando dixo que vira aos seus xogadores "faltos de confianza". Víctor Marco ocupou o lateral esquerdo pola ausencia do capi Manu.

As Palmas saiu a pola vitoria, presionando ben arriba e quitándolle a pelota o Lugo. Tana e Apoño tiveron dúas boas ocasións nos primeiros sete minutos que se foron por pouco. A defensa andaba algo despistada, pero axiña o Lugo empezou a saír con algo de perigo, tocando o balón os catro darriba. Co paso dos minutos, os canarios volveron tomar o mando e Apoño volveuno tentar cun disparo dende case o medio do campo. Foi no minuto 43 cando chegou a mellor ocasión dos locais: un tiro de Tana que parou Jose Juan e Valerón non atinou no rexeite.

Quique Setién non o vía claro e moveu ficha nos vestiarios: reforzou a media con Pablo Álvarez e Rafa García, pero seguiu mandando As Palmas. Valerón desperdiciou un man a man ante Jose Juan. O adestrador local tentouno con Nauzet Alemán e Aranda, pero o partido fíxose entón máis aberto. Rennella tivo un remate coa testa, que parou Barbosa, e tras unha boa xogada persoal enredouse co balón e non chegou a disparar. O 0-0 sería pois definitivo.

O Lugo puxo fin a súa mala xeira (dúas derrotas con nove goles encaixados) e mantivo a súa portaría a cero. Suma 38 puntos e ocupa a 11ª praza, cinco puntos por riba dos postos de descenso (Alavés, 33). A vindeira xornada, no Anxo Carro co Castela (domingo, 18.15 horas).