Por Galicia Confidencial | SANTIAGO DE COMPOSTELA | 09/11/2021 | Actualizada ás 12:53
O Xulgado de Instrución nº2 de Betanzos vén de decretar o sobresemento provisional e arquivo da causa aberta contra 'os 19 Meirás', as persoas acusadas polos Franco pola ocupación do Pazo situado no Concello de Sada en 2017 como parte dunha acción simbólica. Así o veñen de anunciar os propios acusados, que destacan que a sentencia non é firme, cabendo aínda recurso por parte dos Franco ante a Audiencia Provincial
Aínda así, os 19 subliñan o fallo como unha "vitoria" e destacan, igualmente, que seguen a estar "enormemente orgullosas e orgullosos do que fixemos aquel agosto de 2017 coa ocupación simbólica do Pazo de Meirás", particularmente agora unha vez a devolución do inmoble ao Estado é unha realidade, aínda que os Franco manteñan frontes abertas nos xulgados polos mobles do complexo.
Anxo Louzao, voceiro dos 19 de Meirás, lembraba así o acto: “Aquela mañá de agosto un grupo de galegas e galegos, nacionalistas e democrátas, realizamos esta acción porque entendíamos que as institucións públicas tiñan que actuar para pór fin a máis de 80 anos de ignominia”. “A día de hoxe fica absolutamente demostrado que o pazo foi roubado ao pobo galego e que é absolutamente vergoñento que os herdeiros da ditadura sigan a desfrutar dun patrimonio que foi espoliado co sangue de milleiros de galegas e galegos”, engadiu Louzao.
“Corresponde que unha vez que conclúa o proceso xudicial o Pazo sexa transferido á administración galega e que o destino que se lle dea sexa o de honrar a memoria democrática do pobo galego” reclaman desde as e os 19 de Meirás. Con todo, desde este colectivo sinalan que “é innúmero o patrimonio que foi espoliado ao noso pobo por parte da ditadura franquista e que debe ser devolto”, en palabras do propio, Louzao que sinalou como máximos expoñentes deste espolio, ademais do Pazo de Meirás, a coruñesa Casa Cornide ou as esculturas do Pórtico da Gloria, aínda en litixio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.