Por Europa Press / Redacción | SANTIAGO DE COMPOSTELA | 11/11/2021 | Actualizada ás 17:29
A Axencia de Doazón de Órganos e Sangue (ADOS) convida á cidadanía a doar sangue, en especial ás persoas do grupo Cero negativo (0-), porque a "volta á normalidade" nos hospitais galegos "vai propiciar un aumento das intervencións cirúrxicas en todas as especialidades e a consecuente demanda de compoñentes sanguíneos" dos centros sanitarios de Galicia.
Por iso ADOS destaca, nun comunicado de prensa, que é necesaria "a colaboración e xenerosidade de todos e todas para conseguir entre 400 e 500 doazóns de sangue diarias". Ademais, lembra que este mes de novembro termina a primeira fase da campaña de doazón universitaria que, unido aos períodos vacacionais e pontes festivas do próximo mes de decembro, "necesitan dun reforzo na participación" porque, matiza, "pode baixar o número de doazóns, pero non sucede o mesmo coa demanda de compoñentes sanguíneos por parte dos centros hospitalarios".
Por iso, as dez unidades móbiles da Axencia de Doazón de Órganos e Sangue visitarán ao longo destes días numerosos concellos de Galicia para lograr a "participación necesaria" co obxectivo de "garantir o desenvolvemento do intenso labor asistencia dos centros sanitarios galegos".
MUNICIPIOS
En concreto, este venres, 12 de novembro, haberá unidades móbiles nos concellos de Ferrol, Arteixo, A Coruña, Noia, Ames, Vilagarcía de Arousa, Vigo, Cangas do Morrazo, Meira e Xinzo de Limia. Pola súa banda, o sábado día 13 acudirán unidades móbiles aos municipios de Ferrol, Arteixo, Noia, Pontevedra, Vigo e Lugo. Ademais, ADOS lembra que se pode doar sangue nos locais de doazón en hospitais das sete grandes cidades galegas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.