Unha carga policial para "protexer os deputados e o Parlamento"
A Delegación do Goberno defende a actuación dos antidisturbios contra os manifestantes do cerco. Os pechados na Cámara deixan a súa protesta.
Por Galicia Confidencial | Compostela | 11/03/2014 | Actualizada ás 23:16
"Actuouse para repeler as arremetidas de grupos violentos que se amparaban nunha manifestación para provocar graves aletercados", esta é a xustificación dada este martes pola Delegación do Goberno para defender a dura carga policial contra os mariñeiros do cerco que protestaban pola baixada da cota do xurelo.
Nas súas arremetidas a policía detivo a tres persoas, que xa están libres, e feriu a numerosos manifestantes. Con todo, a Delegacion do Goberno suliñou que oito axentes tamén resultaron feridos nos enfrontamentos.
Na súa explicación da carga policial, que indignou a todos os grupos da oposición, a representación do Estado en Galicia suliñou que se actou para protexer "aos deputados e ao Parlamento" da acción dos manifestantes.
Ademais, insistiu en que a protesta era legal no traxecto anunciado, da praza do Obradoiro até a Xunta, pero non así o percorrido que se decidiu unha vez ante o Goberno galego e até o Parlamento de Galicia.
Por iso, e ante a provocación de "grupos violentos" a Policía cargou para restaurar a legalidade xa que, "no mesmo horario estaban convocadas outras dúas manifestacións ante a Cámara lexislativa galega, que si foran comunicadas, polo que os axentes da Policía Nacional debían protexer a estas outras persoas e aos viandantes".
Abandono do peche dos mariñeiros na Cámara galega
Por outra banda, os cinco mariñeiros pechados no Parlamento de Galicia deixaron a última hora a sede do lexislativo tras recibir o compromiso de que este mércores poderán regresar e seguir negociando unha saída para o problema causado pola repartición nas cotas da cabala e xurelo.
Esta decisión tomouse a última hora da tarde, e foi o vicepresidente da Mesa, Miguel Santalices, quen informou deste acordo adoptado coa mediación da Mesa do Parlamento, xa que a Cámara ía reclamar un desaloxo forzoso.
Un destes mariñeiros, José Blanco, sinalou que regresarán co compromiso de volver negociar con todos os partidos e co Goberno autonómico, co presidente ou o vicepresidente.
Pola súa banda, Santalices comprometeuse a que mañá poidan voltar á Cámara e manter as reunións que consideren necesaria. Ademais, asegurou que a Mesa do Parlamento trasladou aos mariñeiros a súa preocupación por que decidisen pasar a noite nas instalacións porque "non queriamos, nin moitísimo menos" que houbese un desaloxo.
